Svein­dís: Hefði kannski átt að gera meira til að koma mér inn í leikinn

Sveindís var spurð að því hvað hún hafi verið að hugsa strax eftir leik. Hún lá í grasinu lengi eftir leik, augljóslega svekkt.

„Bara fúlt að tapa. Erfiður leikur og það er bara ekki gaman að tapa og sérstaklega í svona mikilvægum leik. Við verðum bara að halda áfram og upp með hausinn.“

Horfa má á viðtalið hér að neðan.

Því næst var athyglinni beint að frammistöðu liðsins og var Sveindís spurð að því hvort liðið hafi náð að gera það sem lagt var upp með.

„Mér fannst fyrri hálfleikurinn vera svolítið villtur hjá báðum liðum. Þær fá einhver færi en Cessa ver vel. Fyrri hálfleikurinn var ekkert spes en við mætum miklu grimmari í seinni hálfleik, fáum þetta rauða spjald sem tekur okkar leika alveg niður. Við þurftum að hlaupa dálítið eftir það og svo skora þær mark beint í vinkilinn, óverjandi. Svo næ ég ekki að nýta færi sem ég átti að gera betur í. Svona er þetta.“

En var eitthvað hægt að setja út á rauða spjaldið sem Hildur Antonsdóttir fékk?

„Ég bara veit ekki hvað gerðist og get ekkert sagt. Þetta var bara á mjög vondum tímapunkti og sló okkur út á laginu.“

Eftir svona erfið úrslit er þá ekki hægt að taka eitthvað jákvætt út úr leiknum, eins og það hvernig liðið beit frá sér manni færri?

„Alveg 100%. Þær gera ekki mikið eftir að við verðum færri, nema að skora, og við eiginlega bara eflumst eftir það. Við vissum að við þyrftum að sækja til að ná að jafna en það gekk ekki í dag.“

Má ekki segja að markið hafi legið í loftinu? Finnarnir ógnuðu mikið upp vinstri kantinn þaðan sem markið kom.

„Já já, mér fannst við samt ekki gera neitt hættulegt, þær vilja halda boltanum eins og við vissum fyrirfram, spila inn á miðju en jú þegar maður er færri þá koma færin á mann. Hún klárar þetta bara ótrúlega vel. Heimsklassa afgreiðsla. Bara flott hjá henni.“

Sveindís fékk ekki úr miklu að moða og fórnaði dálítið höndum. Hvað fannst henni vera í gangi þá?

„Ég veit ekki alveg. Þær stýrðu okkur dálítið yfir á hægri kantinn og boltinn var mikið þar og við náðum ekki að koma boltanum yfir á vinstri. Ég var svolítið út úr leiknum og kannski var ég bara pirruð yfir því og hefði kannski átt að gera meira til að koma mér inn í leikinn. Þetta var bara einn af þessum leikjum þar sem maður þarf að vera með meiri fókus og reyna að koma sér betur inn í leikinn.“

Getur það verið að nálgunin á leiknum hafi verið varfærin? Sveindís er með miðvörð í bakverðinum fyrir aftan sig til dæmis.

„Ég veit það ekki. Hún hefur verið í bakverðinum í landsliðinu þannig að kannski er hún bara landsliðsbakvörður. Mér finnst gott að vera með Guðrúnu fyrir aftan mig, hún er góður varnarmaður og sækir þegar hún getur sótt. Ekkert út á það að setja.“

Sveindís fékk mjög gott færi í lok leiksins en náði ekki að nýta það. Verður það myndin í hausnum þegar hún leggst á koddann í kvöld?

„Já pottþétt. Ég held að það sem maður gerir oftast. Sérstaklega þegar þetta hafði talið svona mikið fyrir okkur. Ég man ekki eftir mörgum opnum færum í leiknum og ekki gaman að klúðra besta færinu sem maður fékk. Þetta hefði talið frekar mikið. Þetta er sárt núna og maður þarf að gleyma þessu á morgun.“

Stuðningsmenn Íslands eru klárir í slaginn í næstu leiki og mótið er opið ennþá

„Þetta var frábær stuðningur sem við fengum í dag, stúkan var heldur betur blá og þau létu heyra vel í sér allan leikinn. Þetta skiptir okkur miklu máli og vonandi mæta þær líka á næsta leik. Mjög miklivægur leikur og þetta er allt galopið. Við vinnum Sviss og þá erum við enn inn í þessu. Við ætlum að gera allt til að ná í þessi þrjú stig.“