Selvén aftur í Vestra

Hinn 22 ára Selvén var á láni hjá Vestra á síðustu leiktíð frá OB í Danmörku. Þá lék hann tíu leiki fyrir liðið og skoraði eitt mark. Vængmaðurinn fór þaðan til Utsiktens BK í Svíþjóð en er nú snúinn aftur á Ísafjörð.

„Með tilkomu Johannes Selvén fáum við tæknilega góðan leikmann sem þekkir vel til leikmannahópsins. Johannes er væntanlegur til Ísafjarðar á föstudagskvöld og ætti að vera tiltækur fyrir leikinn gegn Aftureldingu á miðvikudaginn,“ segir í tilkynningu Vestra.

Vestri situr í 6. sæti Bestu deildar með 22 stig að loknum 16 umferðum. Þá eru Vestfirðingar komnir í úrslit Mjólkurbikars karla þar sem Valur bíður.