Samdi við kríuna um að koma sér á brott

Glimrandi aðstæður og gott veður tók við kylfingum er þeir hófu leik á Íslandsmótinu í gærmorgun. Hvaleyrarvöllur hefur tekið töluverðum breytingum undanfarin ár og seinni níu holurnar, þar sem allt ræðst, meira og minna nýjar.

Sérlega mikil vinna hefur þá verið lögð í aðstöðu áhorfenda á Íslandsmótinu í ár þar sem búið er að koma upp risaskjá við flötina á 15. braut og veitingatjaldi við 14. flöt.

„Við höfum verið að reyna að gera betur við áhorfendur sérstaklega. En að sjálfsögðu kylfinga líka, við erum með ellefu forverði, sem fylgjast með upphafshöggunum og hjálpa kylfingum úti á velli,“ segir Ólafur Þór Ágústsson, framkvæmdastjóri golfklúbbsins Keilis.

„Við höfum lagt meira í innviði fyrir áhorfendur. Á risaskjánum má sjá stöðu ráshópa, stöðu í mótinu og tölfræði hjá einstaklingum sem eru að spila vel. Svo er veitingatjald eða fan zone þar sem fólk getur komið út á miðja Hvaleyri, fengið sér léttan snæðing, og þá ertu kominn ofan í síðustu fimm eða sex lokaholurnar á Íslandsmótinu í golfi,“ bætir Ólafur við.

Á blettinum þar sem tjaldið er staðsett hefur heljarinnar kríuger gert kylfingum lífið leitt í sumar. Hún er nú á bak og burt.

„Við flugum saman og komumst að samkomulagi að hún myndi fara. Og hún er farin,“ segir Ólafur léttur.

Seinni níu gjörbreyttar

Það var eftir því tekið að kylfingar áttu til að lenda í vandræðum á síðari níu holum vallarins, sem eru nýlega lagðar. Ríkjandi Íslandsmeistari, Aron Snær Júlíusson, fékk til að mynda skramba og skolla á 16. og 17. braut.

„Það er búið að breyta öllum holum á seinni níu nema einni á síðustu árum. Nú er verið að keppa á Íslandsmótinu í golfi í fyrsta skipti á seinni níu. Það verður skemmtilegt að sjá hvernig það kemur út,“ segir Ólafur.

Axel Bóasson og Dagbjartur Sigurbrandsson leiða keppni karla eftir fyrsta daginn, á fimm undir pari vallar. Þar á eftir koma þeir Tómas Eiríksson Hjaltested og Sigurður Arnar Garðarsson, höggi á eftir.

Í kvennaflokki eru þær Karen Lind Stefánsdóttir og Hulda Clara Gestsdóttir efstar á tveimur undir pari en Elsa Maren Steinarsdóttir og Heiðrún Anna Hlynsdóttir höggi á eftir.

Annar dagur mótsins fór af stað snemma í morgun en efstu kylfingar halda ekki út á völl fyrr en eftir hádegið. Skorið verður niður eftir hring dagsins.