Varar við áhorf­endum á Ryder Cup: „Hey Rahmbo, hvar er Ozempicið?“

Ryder-bikarinn hefst á föstudaginn með keppni í fjórmenningi og hefst bein útsending á Sýn Sport 4 klukkan 11. Síðdegis, eða klukkan 17, hefst svo útsending frá keppni í fjórbolta. Mótið heldur svo áfram á laugardag og sunnudag, í beinni á Sýn Sport 4.

Evrópuliðið hefur sjaldan unnið Bandaríkin þegar keppt er vestan Atlantshafsins og tapaði 19-9 á Whistling Straits fyrir fjórum árum. Áhorfendur létu þar Evrópubúana fá það óþvegið og eftir mótið kvartaði Írinn Shane Lowry yfir því að meira að segja eiginkona hans hefði orðið fyrir barðinu á ljótum köllum áhorfenda.

Það virðist stefna í eitthvað svipað í New York um helgina. Alla vega mátti Spánverjinn Jon Rahm þola háðsglósur þegar hann tók sitt fyrsta högg á æfingahring á þriðjudaginn: „Hey Rahmbo, hvar er Ozempicið?“ heyrðist þá kallað, samkvæmt frétt Daily Mail.

Gæti orðið verra núna

Fyrrverandi golfstjarnan og sérfræðingurinn Laura Davies segir kylfingana tólf sem keppa fyrir Evrópu þurfa að vera við öllu búnir.

„Á Whistling Straits var svo sannarlega farið yfir strikið. Það var mikið um fúkyrði í garð vina og fjölskyldumeðlima kylfinganna, sem var ekki gott, því þeir voru einu stuðningsmennirnir þar sem að það máttu ekki vera neinir evrópskir stuðningsmenn vegna Covid,“ sagði Davies samkvæmt Metro.

„Ég heyrði mikið af hræðilegum köllum í átt að keppendum og þó var mótið í krummaskuði, Whistling Straits. Núna verðum við í New York, með New York stuðningsmenn. Ég vona að þetta gangi ekki of langt en ég yrði ekki hissa ef þetta yrði aftur svona slæmt eða jafnvel verra,“ sagði Davies.

Ryder-bikarinn verður í beinni útsendingu á Sýn Sport 4 föstudag, laugardag og sunnudag. Opnunarhátíðin verður á Sýn Sport 5 í kvöld klukkan 20. Hér má sjá lista yfir allar beinar útsendingar á íþróttarásum Sýnar.