Sýn og Creditinfo í sam­starf um Fram­úr­skarandi fyrir­tæki

Afreksfólk atvinnulífsins

Hrefna Ösp Sigfinnsdóttir, forstjóri Creditinfo segir vottunina Framúrskarandi fyrirtæki hafa mikla þýðingu fyrir þau sem hljóta hana en einungis eru um 2% allra fyrirtækja framúrskarandi, samkvæmt mati Creditinfo.

„Fyrirtækin sem eru á lista yfir Framúrskarandi fyrirtæki hafa staðist mjög strangar kröfur. Algengt er að fyrirtækin nýti vottunina í sinni markaðssókn en hún er sterk traustsyfirlýsing og nýtist því vel í viðskiptum þar sem allt snýst um traust. Við sjáum einnig að vottunin er nýtt í atvinnuauglýsingum því gott sé að vinna fyrir fyrirtæki sem standa traustum fótum,“ segir Hrefna. Þá sé ánægjulegt að geta miðlað sögum þessara fyrirtækja.

„Það er mikilvægt að beina sjónum að því sem vel er gert en undirstaða hagvaxtar eru traust og vel rekin fyrirtæki. Það kemur okkur líka alltaf á óvart hvað það eru mörg öflug fyrirtæki sem sjaldan eða aldrei rata í fréttir en skipta samt sköpum fyrir samfélagið.

Það er því einstaklega ánægjulegt að beint athyglina að þessum fyrirtækjum og heyra þeirra sögur. Við erum mjög ánægð með samstarfið við Sýn sem er dýnamískt og lifandi og við treystum þeim vel til að sýna framúrskarandi fyrirtækjum þá virðingu sem þau eiga skilið," segir Hrefna.

Samstarfið eflir jákvæða viðskiptamenningu

Herdís Dröfn Fjeldsted, forstjóri Sýnar tekur undir með Hrefnu, mikilvægt sé að beina kastljósinu að því sem vel er gert. 

„Vottunin er ekki sjálfsögð, hún er afrakstur strangra viðmiða og ítarlegrar greiningar sem tryggir að aðeins þau fyrirtæki sem standast kröfurnar fá að bera titilinn,“ segir Herdís.

„Með því að miðla og kynna þessa vottun viljum við leggja okkar af mörkum til að efla jákvæða viðskiptamenningu á Íslandi og sýna fram á mikilvægi gagnsæis og faglegra vinnubragða í íslensku atvinnulífi.“

„Við erum stolt af því að hafa sjálf hlotið þessa viðurkenningu, hún er traustsyfirlýsing til viðskiptavina, samstarfsaðila og starfsmanna um að Sýn sé fyrirtæki sem byggir á traustum grunni. Það er okkur mikils virði að vinna með Creditinfo að kynningu á Framúrskarandi fyrirtækjum,“ segir Herdís.

Nýr vefur á Vísi og fjölbreytt umfjöllun

Fjallað verður um verkefnið Framúrskarandi fyrirtæki á miðlum Sýnar. Bein útsending verður á Vísi frá verðlaunaviðburði Creditinfo sem fram fer 30. október og hægt að nálgast viðtöl við forsvarsfólk Framúrskarandi fyrirtækja, greiningar og umfjallanir á nýrri síðu á Vísi sem fer í loftið fyrir viðburðinn.

Samhliða umfjöllunum á Vísi gefst Framúrskarandi fyrirtækjum kostur á að koma sér á framfæri á vefnum. Ragnhildur Guðmundsdóttir, forstöðumaður auglýsingadeildar Sýnar segir sýnileika á einum öflugustu miðlum landsins ómetanlegan í markaðsstarfi fyrirtækja.

Ná augum og eyrum þorra landsmanna

„Þau fyrirtæki sem hljóta vottun hafa náð frábærum árangri í rekstri og við vitum að það er mikil vinna að baki framúrskarandi árangri. Við munum bjóða þeim fyrirtækjum sérsniðna auglýsingapakka á miðlum Sýnar sem ná til 184.000 manns daglega,“ segir Ragnhildur.

Er þitt fyrirtæki framúrskarandi?

Um og yfir þúsund fyrirtæki komast á hverju ári gegnum nálarauga Creditinfo og teljast Framúrskarandi. Ekki er nóg að sýna fram á háar tölur í ársreikningum einnig þarf að tikka í box sem snúa að samfélagslegum þáttum og sjálfbærni. Hér má kynna sér skilyrðin sem uppfylla þarf til að hampa titlinum Framúrskarandi fyrirtæki 2025.

Vísir er í eigu Sýnar.