Búið að birta um­hverfis­mats­skýrslu fyrir Sunda­braut

Sundabraut er fyrirhuguð samgöngubót á höfuðborgarsvæðinu milli Sæbrautar og Kjalarness sem verið hefur í umræðu og undirbúningi allt frá árinu 1975. Í umhverfismatinu sem telur á fimmta hundrað blaðsíður eru bornir saman tveir meginvalkostir við þverun Kleppsvíkur: Sundabrú og Sundagöng, auk þriggja valkosta fyrir legu brautarinnar í Gufunesi. Samantekt á skýrslunni má lesa hér. 

Þá eru mismunandi valkostir fyrir hæð og lengd Sundabrúar til skoðunar auk þess sem áhrif eru metin af ólíkum valkostum fyrir útfærslu gatnamóta á Sæbraut. Skýrslan greinir áhrif ólíkra leiða á umhverfi, samfélag og náttúru og mun verða grundvöllur ákvörðunar um leiðarval.

Vegagerðin segir muninn í hnotskurn þennan:

• Sundabrú er hagkvæmari kostur í framkvæmd og rekstri og styður betur við gangandi og hjólandi vegfarendur, sem og almenningssamgöngur. Hún hefur meiri sjónræn áhrif og takmarkar siglingar um Sundahöfn. Brú tengir Grafarvog og hafnarsvæðið betur inn á stofnvegi.
• Hærri brú hefur meiri áhrif á ásýnd en tryggir siglingar stærri skipa.
• Lægri brú er hagkvæmari en hefur meiri áhrif á starfsemi í Sundahöfn.
• Sundagöng hafa minni áhrif á ásýnd og hafnarstarfsemi, en eru dýrari í framkvæmd og rekstri. Þau styðja síður við fjölbreytta ferðamáta. Auk þess er þörf á aðgerðum til að draga úr loftmengun við gangamunna. Göng tengja Grafarvog og hafnarsvæðið síður inn á stofnvegi.

„Umhverfismatsskýrsla og kynning hennar er mikilvægur áfangi í undirbúningi og vali á milli ólíkra leiða við lagningu Sundabrautar. Spilar þar saman mat á áhrifum og hagkvæmni framkvæmdarinnar. Við hlökkum til uppbyggilegrar umræðu um fyrirliggjandi kosti og að geta innan tíðar hafið formlegt útboðsferli við það sem er líklega umfangsmesta einstaka verkefni tengt samgöngubótum sem ráðist hefur verið í hér á landi,“ segir Bergþóra Þorkelsdóttir, forstjóri Vegagerðarinnar.

Veittur er sex vikna frestur til að skila inn umsögnum við umhverfismatsskýrslu. Samhliða því leitar Skipulagsstofnun umsagna frá lögbundnum umsagnaraðilum og leyfisveitendum.

Á kynningartímabilinu mun Vegagerðin í samstarfi við Reykjavíkurborg kynna niðurstöður umhverfismatsins með opnum kynningarfundum, sem verða sem hér segir:

• 20. október kl. 18:00-19:30. Klébergsskóli, Kjalarnesi
• 21. október kl. 17:30-19:00. Hilton Reykjavík Nordica, Laugardal
• 22. október kl. 17:30-19:00. Borgaskóli, Grafarvogi

Auk þess stendur Vegagerðin fyrir eftirfarandi kynningarfundum:

• 23. október kl. 17:30-19:00. Framhaldsskólinn Mosfellsbæ
• 24. október kl. 9:00-10:30. Vegagerðin, Suðurhrauni 3 í Garðabæ. Fundurinn verður einnig í streymi.
• 4. nóvember kl. 19:30-21:00. Ráðhúsinu, Akranesi