Einn áhrifamestu markaðsfræðimanna heims með erindi á ÍMARk

ÍMARK 1. desember 2025 09:10

Dr. Tomas M. Hult, prófessor við Michigan State University og Daði Guðjónsson, forstöðumaður markaðssamskipta hjá Íslandsstofu flytja erindi á ÍMARK. Katrín M. Guðjónsdóttir formaður ÍMARK stýrir fundinum.

ÍMARK og Háskólinn á Bifröst halda viðburð 9. desember undir yfirskriftinni Árangur í markaðsstarfi - frá gögnum til betri ákvarðanna. Þar verður fjallað um hvernig fyrirtæki geta nýtt gögn og rannsóknir til að skilja viðskiptavini betur og taka markvissari ákvarðanir í markaðsstarfi.

„Dr. Tomas M. Hult, prófessor við Michigan State University var nýverið valinn í hóp áhrifamestu fræðimanna heims í markaðsfræðum árið 2025," segir Katrín M. Guðjónsdóttir, fundarstjóri og formaður ÍMARK en Dr. Tomas flytur erindið „Ánægja viðskiptavina í dag - hvernig gagnadrifin innsýn getur bætt árangur fyrirtækja í smásölu.“

„Hann mun deila innsýn úr rannsóknum um hvað mótar væntingar, upplifun og tryggð viðskiptavina og hvernig gagnadrifin nálgun skilar raunverulegum árangri. Auk hans verður Daði Guðjónsson, forstöðumaður markaðssamskipta hjá Íslandsstofu, með innlegg um árangur og lærdóm úr íslenskum markaðsherferðum á alþjóðavettvangi," segir Katrín en yfirskrift erindis Daða er „Árangur og lærdómur úr íslenskum markaðsherferðum á alþjóðavettvangi.“

Daði mun einnig fara yfir hvað þarf til að vinna Áruna árangursríkustu markaðsherferð ársins - eða hvað einkennir árangursríkar markaðsherferð.

Hér er hægt að tryggja sér miða. Almennt miðaverð er 9.900 krónur. Fyrir aðildarfélaga ÍMARK og námsfólk, 4.900 krónur.

Viðburðurinn fer fram 9. desember milli klukan 11 og 12.30 í Arionbanka Borgartúni 19. Boðið verður upp á léttar hádegisveitingar.