Halli Egils og Alexander í úrslit: „Skal á­rita sokkinn minn á eftir“

Fyrsti leikur kvöldsins var milli Halla Egils og Árna Ágústar. Halli og Árni mættust einmitt á kvöldi 2 í rosalegum leik þar sem Halli vann með 92 í meðaltal á meðan Árni var á eftir honum með 88. 

Halli virtist vera sterkari aðilinn í gærkvöldi og kom sér í 1-0 eftir fyrsta sett. Árna virtist ganga illa að ná að tengja góðar heimsóknir og var duglegur að ögra Halla en ekkert beit á reynsluboltann. 

Sett tvö fór alla leið í oddalegg en oft hefur verið nefnt að Halli sé ein af bestu manneskjum í heimi og það sýndi sig í gær þegar hann virtist skynja það á Árna að ekki allt væri eðlilegt við hans spilamennsku. 

Halli stoppaði örstutta stund og setti út hnefann í átt að Árna og reyndi stappa í hann stálinu. Ekki dugði það samt til og Halli kláraði einvígið 2-0 í settum og var fyrstur til að tryggja sitt sæti í úrslitum. 

Andri Már Eggertsson tók viðtal við Halla eftir leikinn og spurði einmitt Halla út í þetta augnablik. 

Næst var það Grindvíkingurinn sigurstranglegi, Alexander Veigar Þorvaldsson, gegn landsliðsþjálfaranum Kristjáni Sigurðssyni. 

Það virtist einhvern veginn vera sama uppskrift í þessum leik nema núna var það Kristján sem virtist ekki ná að tengja heimsóknir vel saman og var óheppinn að lenda oft í því að missa eina píluna á eitthvað flug. 

Alexander vann fyrsta settið, 3-1, en Kristján ætlaði sér að jafna metin og þurfti að taka oddalegg í setti tvö. Oddaleggurinn fór alla leið í að báðir áttu möguleika á að loka en Alexander náði ekki að klára á 90 og skildi sig eftir í 25. 

Kristján átti þá 75 eftir og náði ekki að klára í tvöföldum 20 fyrir sigri. Alexander steig upp og fór sína leið að klára 25 sem er einfaldur 3 og tvöfaldur 11 sem hann kláraði og benti svo lengst inn í sal þegar hann fagnaði sigrinum. 

Andri ræddi svo við Alexander eftir leikinn og spurði hann út í þetta atvik. Þar sagði Alexander: „Ég var aðeins að troða sokk upp í Helga Pjetur. Hann var að gera grín að því hvernig ég tek út 25. Ég skal árita sokkinn minn á eftir og gefa honum.“ 

Þá er það orðið ljóst að Halli Egils og Alexander Veigar mætast um næstu helgi um sigur í úrvalsdeildinni og stefnir í alvöru kvöld. Spilað verður best af 5 í settum þannig það verður nóg að pílu þrátt fyrir að það sé bara einn leikur. Færri hafa komist að en vildu á síðustu úrslitakvöld í úrvalsdeildinni á Bullseye og þá er um að gera að byrja að ráðstafa hlutum og tryggja sér sæti í salnum. 

Bein útsending frá úrslitaleiknum hefst klukkan 20:00 næstkomandi laugardag á Sýn Sport.