Brenndi á sér höndina áður en hann kýldi í borðið

Menzies brást illa við eftir að hafa tapað fyrir hinum tvítuga Manby, 3-2, í 1. umferð heimsmeistaramótsins í gær.

Skotinn kýldi nokkrum sinnum í borð og var blóðugur á höndinni þegar hann gekk af sviðinu.

Á myndbandi sem fór í dreifingu á samfélagsmiðlum í gær sást að Menzies lét sér ekki nægja að taka reiði sína út á borðinu.

Áður en hann sló í það setti hann nefnilega höndina ofan á kassa á sviðinu sem skaut eldglæringum upp í loftið eftir að sigur Manbys var í höfn.

Skömmu eftir leikinn í gær baðst Menzies afsökunar á æðiskastinu sem hann tók. Hann sagðist hafa verið undir miklu álagi að undanförnu og væri nýbúinn að missa frænda sinn sem hefði verið honum kær.

Menzies sagði þó að hann ætti sér litlar málsbætur og óskaði Manby til hamingju með sigurinn.