„Enginn vildi að ég myndi vinna“

Þetta var fyrsti leikurinn á mótinu þar sem Littler lenti í smá vandræðum en hann kláraði leikinn vel og slapp við að enda í oddasetti.

Það vakti samt talsverða athygli í Ally Pally í kvöld þegar áhorfendur fóru að baula á ríkjandi heimsmeistara. Það lítur hreinlega út fyrir að hinn ungi Littler sé að gera allt sem hann getur til að fá áhorfendurna upp á móti sér. 

Það gæti verið hættulegur leikur haldi hann því áfram en strákurinn er auðvitað enn bara átján ára gamall.

„Mér er alveg sama. Virkilega alveg sama,“ sagði Luke Littler um baulið og sneri sér síðan að áhorfendum:

„Þið borgið fyrir miðana og þið borgið fyrir verðlaunaféð mitt þannig að takk fyrir að púa á mig,“ sagði Littler. Littler virðist samt vera að komast á þann stað að úrvalsleikmenn geta spilað sinn besta leik en komast samt ekki nálægt því að sigra hann.

„Ég þurfti bara að halda mínu, Rob náði mér og ég þurfti að ná honum til baka. Ég vissi að ef Rob myndi kasta 180 þá væri hann með 162 eftir svo ég hafði sex píluköst í það. Það var ekki mikil pressa. Ég sá tölfræðina þá. Enginn vildi að ég myndi vinna en ég sannaði enn og aftur að þau höfðu rangt fyrir sér,“ sagði Littler. Hann var með meðaltali í leiknum upp á 106.58.

„Þetta er ekki alveg í höfn enn þá. Maður þarf að komast í úrslitaleikinn. Ég ætla að njóta tveggja daga frís og svo verð ég mættur aftur á nýársdag. Ég eyði gamlárskvöldi og nýársdegi í London eins og undanfarin ár,“ sagði Littler. 

Hann hefur komist í úrslitaleikinn undanfarin tvö ár og hefur verið í átta manna úrslitum á öllum þremur heimsmeistaramótum sínum á ferlinum.