Jafnaði sig af heilaskurðaðgerð og mætir Littler á af­mælis­daginn

Hinn 48 ára gamli Ratajski hefur aldrei unnið stærstu mótin eða orðið heimsmeistari en öðlaðist frægð fyrir mikinn stöðugleika og hélt sér í fremstu röð pílukastara um árabil. Hann er líka brautryðjandi í heimalandinu og var fyrsti Pólverjinn til að keppa á HM í pílukasti.

Á síðasta ári féll hann út af heimslistanum í fyrsta sinn á ferlinum en hann greindi frá því eftir að hafa unnið Wesley Plaisier, með hádramatískum hætti í síðustu umferð, að hann hefði gengist undir tvær heilaskurðaðgerðir á síðasta ári.

„Ég fagna ekki oft, en þegar leikurinn er svona tæpur og maður nær að snúa við 3-1 stöðu þá leyfir maður sér að fagna… Ég hef verið að glíma við vandamál tengd heilsunni en það er allt í góðu lagi núna. Vonandi get ég farið að klifra aftur upp heimslistann“ sagði Ratajski.

Í dag sló hann svo rísandi stjörnuna Luke Woodhouse út í sextán manna úrslitum og komst áfram í átta manna úrslit. Spennan var áþreifanleg í viðureign þeirra tveggja en Ratajski vann síðustu tvö settin örugglega og leikinn að endingu 4-2.

Pólski örninn mun svo mæta efsta manni heimslistans og ríkjandi heimsmeistaranum, Luke Littler, í átta manna úrslitum á nýársdag.

Þar verður Ratajski væntanlega vel tekið af áhorfendum í salnum, enda fagnar hann 49 ára afmæli sama dag.

Á sama tíma má búast við því að áhorfendur í salnum láti Luke Littler heyra það, eftir ummælin sem kappinn lét falla í gærkvöldi.