Selur Ólympíugullverðlaunin eftir skilnað við eigin­konuna

Lochte seldi áður sex brons- og silfurverðlaun frá Ólympíuleikum fyrir 166 þúsund dollara árið 2022. 

Hann hefur nú losað sig við gullverðlaun sín úr 4x200 metra skriðsundsboðsundi frá Sumarólympíuleikunum í Peking 2008 (183.000 dollarar, 23,1 milljón króna), sem hann vann með Michael Phelps, auk gullverðlauna sinna úr 4x200 metra boðsundi frá Sumarólympíuleikunum í Aþenu 2004 (80.000 dollarar, 10,1 milljón króna) og gullverðlauna sinna úr 4x200 metra skriðsundsboðsundi frá Sumarólympíuleikunum í Ríó 2016 (122.000 dollarar, 15,4 milljónir króna).

Sótti um skilnað eftir sjö ára hjónaband

Salan á sér stað í kjölfar skilnaðar Lochte og eiginkonu hans, Reid, sem nýlega sótti um skilnað eftir sjö ára hjónaband. Skilnaður þeirra hefur vakið mikla athygli vestan hafs.

Í fyrstu kallaði fyrrverandi Playboy-fyrirsætan skilnaðinn „sársaukafullan“ á meðan Lochte sagðist vera „innilega þakklátur fyrir lífið sem við byggðum upp saman“. Í síðasta mánuði varpaði Lochte frekara ljósi á stöðuna þegar hann útskýrði ákvörðun sína um að selja verðlaunin.

Of tilfinningaþrunginn til að tjá sig

Hinn 41 árs gamli tólffaldi verðlaunahafi sendi frá sér yfirlýsingu á samfélagsmiðlum þar sem hann játaði að hann væri „of tilfinningaþrunginn til að tjá sig“ eftir að hafa mætt hörðum viðbrögðum almennings vegna nýlegra ummæla.

Um Ólympíuverðlaunin sín sagði Lochte, sem nýlega var orðinn edrú:

„Ég synti aldrei fyrir gullverðlaunin“

„Ég vil líka taka það skýrt fram varðandi sölu verðlaunanna minna. Ég synti aldrei fyrir gullverðlaunin. Ástríða mín hefur alltaf snúist um að vera einn af bestu sundmönnum í heimi,“ skrifaði Lochte. 

„Þessi verðlaun? Þau voru bara rúsínan í pylsuendanum á ótrúlegu ferðalagi. Með níutíu alþjóðleg verðlaun, þar á meðal frá Ólympíuleikum, heimsmeistaramótum, Pan Pacs og Pan Am leikum,  hef ég verið svo heppinn að ná meiri árangri en nokkur annar sundmaður,“ skrifaði Lochte.

Fyrr í vikunni birtist sundmaðurinn í myndbandi frá Goldin-uppboðshúsinu þar sem hann tilkynnti að þrjú af sex gullverðlaunum sem hann vann yrðu fáanleg til kaups.

Vann alls sex gullverðaun

Á ferli sínum í lauginni vann Lochte sex gullverðlaun alls, auk sex annarra, annaðhvort silfur- eða bronsverðlauna. Sjö þeirra voru í einstaklingsgreinum.

Lochte ræddi einnig skilnað sinn við Reid og viðurkenndi eigin mistök í hjónabandinu en sagði að „við þekktumst ekki að fullu“. 

„Það er mikið í gangi á bak við tjöldin sem ég hef kosið að halda fyrir mig til að vernda börnin mín. Ég geri mér samt grein fyrir því að Kayla hefur deilt hjúskaparheitum okkar á síðunni sinni,“ sagði Lochte.