Krútteyjurnar Ischia og Sikil­ey: Ástu leist ekki á einnar evru húsin

Lóa Pind Aldísardóttir heimsækir hana til Sikileyjar í 1. þætti af sjöundu þáttaröð af Hvar er best að búa? sem hóf göngu sína á streymiveitunni Sýn+ í dag. Hann verður seinna sýndur í opinni dagskrá Sýnar. Í fyrsta þætti heimsækir hún einnig Kolbrúnu Dögg Eggertsdóttur sem féll fyrir ítölskum pilti þegar hún starfaði sem au-pair í London fyrir allmörgum árum. Það leiddi til þess að hún býr nú, ásamt fjölskyldu sinni, á einhverri krúttlegustu eyju Ítalíu, Ischiu, þar sem einungis um 60 þúsund manns búa árið um kring en fjöldi ferðamanna heimsækir á hverju ári.

Milli Njarðvíkur og Póllands

Í þáttaröðinni heimsækir Lóa alls konar fólk, m.a. unga frumkvöðla sem ákváðu að setjast að nálægt alþjóðaflugvöllum til að auðvelda ferðalög milli heimsálfa, kjarnafjölskyldu úr Hafnarfirði sem hafnaði íslenska lánakerfinu og eiga nú skuldlaust hús í spænskri sveit, körfuboltafjölskyldu sem hefur verið í fjarbúð milli ótal landa og deilir nú tíma sínum milli Njarðvíkur og Póllands, ungri konu sem stofnaði veislutertufyrirtæki í Köben og konu á miðjum aldri sem fann ástina í örmum Spánverja á Djúpavogi sem leiddi þau til Andalúsíu þar sem við fylgjumst með brúðkaupi þeirra. Og loks kynnumst við hjónum á besta aldri sem höfðu kjark til að setjast að í alræmdri stórborg í Nígeríu umkringd vopnuðum öryggisvörðum.

Í myndbandinu sem hér fylgir má sjá brot úr þættinum.

Framleiðandi og leikstjóri þáttanna er Lóa Pind Aldísardóttir, myndatökumenn eru Ívar Kristján Ívarsson og Hákon Pálsson, klippingu annaðist Magnús Ingvar Bjarnason. Framleitt af Lóu Production fyrir Sýn.