„Þetta er sárara en tárum taki“

Þetta segir barnamálaráðherra um raunir manna sem greindu frá því að hafa verið beittir grófu ofbeldi yfir langt skeið á meðan þeir voru í fóstri í sveitabæ á Suðurlandi. Kerfið hafi brugðist drengjum sem hún lýsir sem hetjum.

Fjallað var um mál drengjanna í Kveik í gær sem voru ungir sendir á bæinn Bakkakot. Barnaverndaryfirvöld sendu börn á bæinn í tæpa þrjá áratugi. Níu menn hafa stigið fram og krafist rannsóknar og bóta frá hinu opinbera.

„Ég veit bara það að núna í dag er miklu meira eftirlit og ég mun sérstaklega skoða hvar í rauninni er verið að vista börn og hvernig þeim úrræðum er háttað og þetta er, þetta er sárara en tárum taki. Þessir menn eru algjörar hetjur, þetta hefur haft djúpstæð áhrif og fyrir einhverja þeirra þannig að þeir hafa í rauninni gjörsamlega bugast í sinni tilveru eins og við sjáum og ég á bara erfitt með að tala um þetta,“ segir Inga Sæland barnamálaráðherra. Hún ræddi málið í Reykjavík síðdegis á Bylgjunni.

„Mér finnst þetta svo ómennskt eitthvað. Að ráðast svona á börn sem eiga bágt fyrir. Ég bara skil ekki svona.“

Fréttin er í vinnslu.