Hörður Axel: Ætlum að gera allt til þess að vinna bikarinn

„Við héldum áfram í fjörutíu mínútur. Við vissum að þetta yrði erfiður leikur og þær komu alltaf til baka og þær eru lið sem heldur alltaf áfram. Við náðum þessu upp í þrettán stig og þetta var ákveðið hark þessi sigur,“ sagði Hörður Axel í viðtali við Vísi eftir leik.

Hamar/Þór tók frumkvæðið í leiknum og komst tíu stigum yfir í fyrsta leikhluta. Aðspurður út í byrjun liðsins sagði Hörður að hún væri hluti af leiknum.

„Það er eðli leiksins að það komi áhlaup fram og til baka. Við töluðum mikið um það fyrir leik að við værum að fara spila í fjörutíu mínútur sama hvernig leikurinn yrði þyrftum við alltaf að halda áfram og halda ákefðinni og spila allar fjörutíu mínúturnar af krafti sama hver staðan væri í leiknum.“

Keflavík var undir í hálfleik og Ana Clara Paz og Jovana Markovic höfðu gert 26 af 38 stigum Hamars/Þórs en Hörður var ánægður með áherslubreytingar í seinni hálfleik.

„Við vorum í bullandi veseni með Ana Clara Paz í fyrri hálfleik sérstaklega. Við náðum að breyta í síðari hálfleik og Thelma Dís gerði rosalega vel á hana varnarlega en svo komu aðrir leikmenn hjá þeim sem stigu upp. Hamar/Þór er mun betra lið en taflan gefur til kynna og þær hafa sýnt það.“

Keflavík byrjaði fjórða leikhluta betur og gerði fyrstu sjö stigin og komst þrettán stigum yfir 68-55 en þá tók Hákon Hjartarson, þjálfari Hamars/Þórs, leikhlé.

„Þetta er svo fljótt að breytast í þessu. Við settum tvo þrista í röð og þá var augnablikið með okkur sem varð til þess að Hákon þurfti að taka leikhlé. Þetta er partur af leiknum og það eru áhlaup í þessu.“

Hörður Axel er fullur tilhlökkunar að spila bikarúrslitaleik í Smáranum á laugardaginn og sagði að liðið myndi gefa allt í þann leik.

„Tilfinningin er mjög góð að spila til úrslita á laugardaginn. Þetta var eitt af okkar markmiðum að komast í bikarúrslit. Við ætlum okkur að gera allt til að vinna þá líka,“ sagði Hörður Axel að lokum.