Hækkuðu gjaldið í skugga stúdentamótmæla

Stúdentahreyfingin Röskva hélt mótmæli í dag fyrir utan háskólaráðsfund í Aðalbyggingu Háskóla Íslands. Í fundi háskólaráðs var staðfest ákvörðun um að hækka skrásetningargjald skólans um þriðjung. Gjaldið hefur verið 75 þúsund krónur frá 2013 en verður nú hækkað í 100 þúsund krónur. 

Menningar-, nýsköpunar- og háskólaráðherra tilkynnti um hækkunina í haust og er ákvörðun háskólaráðs tekin í samræmi við lagabreytingu sem heimilar opinberum háskólum að rukka allt að 100 þúsund krónur í skrásetningargjöld.

Stúdentahreyfingarnar Röskva og Vaka hafa báðar mótmælt hækkununum harðlega. Ármann Leifsson forseti Röskvu sagði í viðtali við Vísi í dag að nemendum þætti óásættanlegt að þeir eigi að borga brúsann.

Völdu opinbert nám 

„Við erum í raun bara að mótmæla því að færa eigi vanfjármögnun háskólanna, sem er búin að vera stöðug í um áratug, yfir á nemendur,“ bætti Ármann við og að nemendur hafi áhyggjur af því að hækkunin sé aðeins sú fyrsta af mörgum. Þannig hafi það verið þegar gjöldin voru hækkuð síðast. Hann ítrekar að það sé ekki stúdentanna að fjármagna skólann.

„Við völdum opinbert nám mörg vegna þess að það yrði ekki jafn dýrt. Sum okkar eiga ekki efni á námi við Háskólann í Reykjavík.“

Í tilkynningu frá Röskvu vegna mótmælanna segir að þegar stúdentahreyfingin hafi verið í meirihluta Stúdentaráðs Háskóla Íslands á árunum 2017 til 2024 hafi þeim tvívegis tekist að koma í veg fyrir áform stjórnvalda um slíka hækkun, árin 2020 og 2022.

„Röskva mótmælir hækkun gjaldsins á þeim grundvelli að hækkunin skerði jafnt aðgengi að námi, en Röskva var stofnuð til að standa vörð um það.“

Samkvæmt tilkynningu mun umboðsmanni Alþingis fljótlega berast kvörtun vegna málsins frá Jessýju Jónsdóttir.

„Að mati Röskvuliða er lausnina á fjárhagsvanda Háskóla Íslands ekki að finna í vösum stúdenta, heldur sé það á ábyrgð stjórnvalda að fjármagna opinbera háskólamenntun,“ segir í tilkynningu Röskvu.

Þar kemur einnig fram að á mótmælunum hafi Röskvuliðar prentað út og límt undirskriftalista á gólf rektorsgangs, þar sem fundurinn átti sér stað. Listinn hafi verið undirritaður af fleiri en þúsund manns.

Andri Már Tómasson, fulltrúi stúdenta í háskólaráði og Röskvuliði, lagði fram bókun á fundinum þar sem hann sagðist harma að Háskóli Íslands ætli að seilast í vasa stúdenta til að fylla upp í stækkandi hyldýpi vanfjármögnunar.

„Málflutningur stúdenta hefur verið skýr í fjölda ára. Við teljum enn að skrásetningagjöldin séu byggð á ólögmætum grunni og hefur verið óskað eftir því að umboðsmaður Alþingis taki málið til skoðunar. Íslenska ríkið er ábyrgt fyrir fjármögnun Háskóla Íslands, ekki stúdentar,“ segir að lokum í bókun hans.

„Það er auðvitað ósanngjarnt að þessi kostnaður falli á stúdenta og það er okkar verkefni að vinna með þeim að því að þrýsta á stjórnvöld um að fjármagna háskólastigið betur,“ segir Silja Bára R. Ómarsdóttir, rektor Háskóla Íslands, í tilkynningu á vef háskólans um málið. Þar er birt ný gjaldskrá háskólans sem nú hefur tekið gildi. 

Gjaldskrá Háskóla Íslands eftir breytingar á skrásetningargjöldum er svohljóðandi:

• Skrásetningargjald: kr. 100.000
• Skrásetningargjald – nýskráning á vormisseri: kr. 75.000
• Skrásetningargjald – gestanemandi á samningi: kr. 15.000
• Skrásetningargjald – gestanemandi án samnings: kr. 30.000
• Skrásetningargjald – í leyfi: kr. 15.000
• Skrásetningargjald – úr leyfi: kr. 85.000
• Lagt er 15% álag á skrásetningargjald sé það greitt utan auglýsts greiðslutímabils.
• Öryrkjar fá 25% afslátt af skrásetningargjaldi.

Fréttin hefur verið uppfærð, bæði með tilkynningu Röskvu og svo aftur með tilkynningu háskólans.