Haraldur Sigurðs­son – Halli – er látinn

Halli fæddist 5. júní 1942 og því á 84. aldursári. Á löngu tímabili var hann einn þekktasti bílasölumaður landsins en hann starfaði fyrir Jöfur og var áberandi andlit fyrirtækisins sem slíkur. Störf hans í skemmtanabransanum er þó það sem mun halda nafni hans á lofti um ófyrirsjáanlega framtíð.

Eins og áður sagði var Halli Hallinn í Halla og Ladda en Halli er eldri bróðir Þórhalls Sigurðssonar, Ladda. Þeir bræður kynntust þegar þeir dvöldu hjá afa sínum og ömmu í Rangárvallasýslu, þar sem Halli ólst upp, í Miðey í Landeyjum nánar tiltekið. Þar í sveitinni kynntist Halli hljómsveitamennsku og starfaði með nokkrum sveitum eða allt þar til hann gekk til liðs við hljómsveitina Faxa hvar Laddi bróðir hans var einmitt trommuleikari.

Halli hóf störf hjá ríkissjónvarpinu sem leikmunavörður í kringum 1970 en þangað kom Laddi einnig til starfa og þá varð hinn frægi dúett til. Þeir ljáðu brúðunum Glámi og Skrámi raddir sínar og upp úr því fóru þeir að skemmta vítt og breitt um landið.

Sumarið 1976 kom fyrsta grínplata þeirra bræðra út, sem var gefin út í samstarfi við Gísla Rúnar Jónsson og hét hún Látum sem ekkert C. Sú plata sló rækilega í gegn og ári síðar kom út platan Fyrr má nú aldeilis fyrrvera en báðar þessar plötur eru fyrir löngu orðnar sígildar í íslenskri plötuútgáfu. Þeir Laddi fóru að skemmta með hljómsveitinni Brimkló og ferðuðust með hljómsveitinni um landið. Og fljótlega upp úr því, eða 1979, stofnuðu þeir bræður HLH-flokkinn auk Björgvins Halldórssonar.

Hér er hlaupið á hundavaði yfir merkan feril Haralds í skemmtanabransanum en mætti þar tæpa á ýmsu fleiru. Halli eignaðist ásamt konu sinni Ragnhildi Ólafsdóttur, en þau voru saman í 57 ár, tvær dætur, þær Ólöfu Unu og Helgu Dögg en auk þess átti Halli átti dóttur sem búsett er á Húsavík, Jóhönnu Báru. Halli átti við vanheilsu að stríða síðustu ár ævi sinnar en það var heilablæðing sem varð honum að aldurtila.