Minnis­stæð heim­sókn til Davíðs fyrir jól

Morgunblaðið greindi frá andláti Davíðs í morgun en hann lést á heimili sínu í Skerjafirði í gær, 78 ára að aldri. Davíð fæddist þann 17. janúar 1948, gekk í MR og fór síðar í lögfræði. Davíð var kjörinn í borgarstjórn 1974, varð borgarstjóri 1982 í níu ár til ársins 1991 þegar hann varð formaður Sjálfstæðisflokksins og sama ár forsætisráðherra. Því embætti gegndi hann í þrettán ár til 2004 en þá varð hann utanríkisráðherra í eitt ár þar til hann hætti í stjórnmálum árið 2005 og varð seðlabankastjóri. Árið 2009 varð hann ritstjóri Morgunblaðsins og hefur verið í því starfi síðan. Guðrún Hafsteinsdóttir formaður Sjálfstæðisflokksins segir tíðindin af andláti Davíðs hafa komið sér í opna skjöldu.

„Ég heyrði þessi tíðindi í gærkvöldi og vitaskuld var mér verulega brugðið. Og ég hafði ekki heyrt af neinum aðdraganda. Þannig að einhvern veginn heldur maður alltaf að það muni allir verða manni samferða alla tíð í gegnum lífið, en það er ekki svo. Og þannig að mér eins og öllum landsmönnum var brugðið við þessi tíðindi.“

Fáir muni geta fetað í fótspor Davíðs

Guðrún segir ljóst að fallinn sé frá einn áhrifamesti stjórnmálamaður í sögu íslenska lýðveldisins.

„Ég var ung manneskja, eða yngri þegar hann var við völd í íslenskri pólitík. Og fylgdist með honum, hvernig hann breytti Íslandi og þessum miklu hæfileikum hans og þessum óvenjulegu hæfileikum að ná til fólks. Að geta alltaf verið með puttann á púlsinum og hvernig hann mótaði samfélagið með hugmyndum sínum og forystu. Það er risastórt og það munu fáir geta fetað í þau fótspor aftur. Ef nokkur.“

Hún segir marga eiga góðar minningar af Davíð og ein af hennar minningum komi upp í hugann.

Núna fyrir jólin þá bauð Davíð mér í heimsókn til sín á heimili sitt og við áttum þar góða stund saman þar sem við ræddum lífsins gagn og nauðsynjar bæði fortíð, nútíð og framtíð. Og hann var einstaklega hlýlegur og sýndi mér hlið á sjálfum sér sem að ég hafði ekki kynnst áður. Og núna vitaskuld við þessi tíðindi að þá er þessi stund mér mjög hjartnæm akkúrat núna.“