Bjóða upp á tjald­svæði inni

Síðastliðin ár hafa nokkur tjaldsvæði staðið til boða fyrir þá sem vilja tjalda á Þjóðhátíð. Í nýrri auglýsingu fyrir hátíðina er tekið fram að ný staðsetning verður á tjaldsvæðum ÍBV í ár.

Tjaldsvæði ÍBV hefur hingað til verið á Þórsvelli en nú mun starfsemi Rent-a-Tent færast þangað og ÍBV fer yfir á Týsvöll. 

„En að sama skapi stendur það til hjá okkur að opna tjaldsvæði inni í Herjólfshöll. Við viljum bjóða gestum upp á ákveðinn lúxus að vera innandyra, sem er bæði gott þegar viðrar illa og viðrar vel,“ segir Ellert Scheving Pálsson, framkvæmdastjóri ÍBV.

Ekki er þetta í fyrsta skipti sem tjaldbúar leita inn fyrir veggi Herjólfshallar en á Þjóðhátíð árið 2025 fengu gestir þar inn vegna slæms veðurs. Hætt var við brennuna og bæði símar og stígvél seldust upp á eyjunni.

„Þetta eru hlutir sem við erum að vinna að og kemur væntanlega í sölu fljótlega,“ segir Ellert.

Forsala á hátíðina hófst um helgina og segir Ellert hana ákveðinn vorboða auk þess sem veturinn sé settur í baksýnisspegilinn. Miðasalan hafi þá byrjað vel.

„Eins og Erpur segir: drullaðu þér í dalinn.“