Tveir látnir eftir skot­á­rás nærri Players meistara­mótinu

Þetta kemur fram í frétt BBC í dag en samkvæmt lögregluyfirvöldum á svæðinu sá skotárásin til þess að áhorfendum var ekki hleypt inn á vallarsvæðið á tilsettum tíma fyrir þriðja keppnisdag mótsins í dag.

Skotárásin átti sér stað innan við tveimur kílómetrum frá TPC Sawgrass vellinum en morðinginn, maður að nafni Christian Barrios hefur verið handtekinn en í tilraun sinni til þess að flýja lögregluna fór hann inn á vallarsvæði TPC Sawgrass. 

Þar komst hann yfir talstöð sem starfsfólk PGA mótaraðarinnar notar og hafði þar samband við starfsmann mótaraðarinnar. Í hamaganginum missti hann talstöðina og af henni fundu leitarhundar lykt sem kom þeim á sporið þar sem að þeir eltu uppi Barrios sem var handtekinn fyrr í dag.

Keppni er nú hafin á þriðja keppnisdegi Players meistaramótsins. Það er Svíin Ludvig Aberg sem leiðir mótið eftir fyrstu tvo hringi þess.