Til­raun til manndráps í bílakjallara í Borgar­túni

Fimm karlmenn voru úrskurðaðir í gæsluvarðhald fyrir Héraðsdómi Reykjavíkur vegna lífshættulegrar líkamsárásar í bílakjallara í Borgartúni aðfaranótt þriðjudags. Fjórir til föstudags en einn í vikulangt varðhald.

Eiríkur Valberg, lögreglufulltrúi hjá rannsóknardeild lögreglunnar, staðfestir að málið hafi verið fært frá lögreglustöð eitt á höfuðborgarsvæðinu yfir til miðlægrar deildar skömmu eftir að málið kom upp. Málið er nú rannsakað sem tilraun til manndráps og er rannsóknin á viðkvæmu stigi. Að öðru leyti verst lögregla allra fregna.

Sjö voru upprunalega handteknir en samkvæmt upplýsingum frá lögreglu voru brotaþolar þrír. Samkvæmt heimildum fréttastofu voru þó töluvert fleiri viðstaddir í kjallaranum, jafnvel tugir manna. Árásin hafi verið lífshættuleg en einn slasaðist meira en aðrir og var minnst einn hnífur notaður við verknaðinn ásamt kylfum. Þá hafi ökutæki verið ekið á brotaþola.

Samkvæmt heimildum fréttastofu er að mestu leyti um erlenda ríkisborgara að ræða. Hluti þeirra hefur dvalið í skamma stund hér á landi. Ekki liggur fyrir hvers vegna svo mikill fjöldi kom saman í umræddum bílakjallara eða hvers konar atvik eða uppgjör hafi verið um að ræða en samkvæmt heimildum er það meðal þess lögregla reynir nú að ná utan um.