Þrjár nýjar renni­brautir á Sauð­ár­króki í sumar

Fram kemur í tilkynningu frá sveitarfélaginu Skagafirði að Fjársýsla ríkisins hafi fyrir hönd sveitarfélagsins sett framkvæmdina í útboð síðasta sumar. Tilboð Sportís hafi verið metið hagkvæmast að teknu tilliti til verðs- og gæðamats.

„Um er að ræða þrjár rennibrautir, þar af tvær sem tengjast við nýjan 12 m. háan uppgönguturn. Turninn verður upphitaður, klæddur plexigleri og með LED-lýsingu. Ljóst er að mannvirkið mun setja svip sinn á bæinn,“ segir í tilkynningunni.

Þar kemur einnig fram að verktakar á vegum Sportís vinni nú að því að undirbúa undirstöður mannvirkjanna. Reiknað er með því samkvæmt tilkynningu að sjálfar rennibrautirnar og turninn verði komin hingað til lands í maí. Uppsetning þeirra hefjist í kjölfarið og ef allt gengur að óskum megi gera ráð fyrir að mannvirkið verði tekið í notkun í júní.

Um rennibrautirnar segir í tilkynningunni:

Hæsta rennibrautin verður 65 m. löng, með fjórum slaufum og fallhæð hennar 9,5 m. frá hæstu stöðu og niður í lendingarbraut, sem er 10 m. á lengd. Rennibrautin verður í lokuðu, heilu röri, með tveimur ljósagöngum á leiðinni. Rennibrautin sem er neðar í turninum er breið og opin, 8,5 m. löng og fallhæð 2,5 m. frá hæstu stöðu og niður í lendingarlaugina sem er vestast á nýja sundlaugarsvæðinu. Þriðja rennibrautin er einnig í lokuðu, heilu röri. Lengd hennar er 5 m. og fallhæð 1 m. Lendingarsvæði hennar er í minni kennslulauginni á nýja sundlaugarsvæðinu.