Gengst nú við að gaspra í Rússa

Framkvæmdastjórn Evrópusambandsins hefur krafið Ungverja skýringa eftir að bandaríska blaðið Washington Post greindi frá því um helgina að Péter Szijjártó, utanríkisráðherra Ungverjalands, hefði átt það til að hringja í Sergei Lavrov, rússneskan starfsbróður sinn, í fundarhléum á leiðtogafundum hjá ESB.

Szijjártó kallaði þetta „falsfréttir“ og kollegi hans sem er yfir Evrópumálum í ríkisstjórn Viktors Orbán tengdi þær við örvæntingu vegna þess að Orbán væri að ná vopnum sínum í kosningabaráttu fyrir kosningar sem fara fram í næsta mánuði.

Nú hefur Szijjártó hins vegar vent kvæði sínu í kross og gengist við því að ræða reglulega við rússneska ráðamenn fyrir og eftir leiðtogafundi í Evrópu.

„Ég ræði ekki aðeins við rússneska utanríkisráðherrann en einnig við þann bandaríska, tyrkneska, ísraelska, serbneska og aðra bandamenn okkar fyrir og eftir fundi leiðtogaráðs Evrópusambandsins,“ sagði Szijjártó á kosningafundi í gærkvöldi, að sögn evrópska blaðsins Politico.

Ákvarðanir sem teknar væru á vettvangi Evrópusambandsins hefðu áhrif á tengsl og samstarf Ungverjalands við önnur ríki utan sambandsins.

Evrópskir ráðamenn eru sagðir hafa brugðist við grunsemdum um að ungverskir ráðamenn lækju viðkvæmum upplýsingum í Rússa með því að takmarka hverju þeir deildu á fundum. Þá hefðu þeir í auknum mæli tekið upp á því að funda í minni hópum til þess að halda trúnaði um vissar upplýsingar.

Þýskir þingmenn og evrópskir embættismenn eru einnig sagðir hafa áhyggjur af aðgangi þingmanna Valkosts fyrir Þýskaland, fjarhægriflokks í Þýskalandi, að þúsundum trúnaðarskjala Evrópusambandsins sem þær gætu lekið til Rússa.

Á meðal slíkra gagna eru minnisblöð eftir fundi sendiherra aðildarríkjanna þar sem rætt er um stuðning við Úkraínumenn og fjárvetingar til þeirra sem eru fjármagnaðar með frystum fjármunum Rússa í Evrópu.