Arnar: Svo áttar maður sig á því að maður er fá­viti

„Þetta er bara stór sigur fyrir okkur“, sagði Arnar þegar hann var spurður út í hversu ánægður hann var með að ná að klára leikinn með sigri.

„Við erum að jafna besta árangur Tindastóls í 22 leikja deild, við náðum reyndar að vinna deildarmeistaratitilinn síðast en ekki núna en við unnum einum sigri meira núna. Það er bara mjög skemmtilegt því við spiluðum 11 auka leiki. Það er eitthvað sem við erum stoltir af.“

Tindastóll gulltryggði með sigrinum að þeir endi í öðru sæti deildarkeppninnar og var Arnar spurður að því hversu mikilvægt það væri að vera í því sæti úr því sem var komið með fyrsta sætið.

„Það skiptir bara máli ef við stöndum okkur vel í átta liða úrslitum.“

Arnar var ekki tilbúinn að leggja mat á það hvernig honum litist á að mæta ÍR í fyrstu umferð úrslitakeppninnar.

„Við kíkjum bara á það þegar við komum heim. Nú er bara að bomba heim áður en þeir loka á okkur fjallið.“

Hvernig unnu Tindastóll þennan leik?

„Ég veit það ekki alveg. Við áttum í töluverðu basli með þá í upphafi leiks. Mér fannst við binda vörnina betur saman þegar leið á og við fengum framlag frá mörgum.“

Það var mikil orka í leikmönnum og hátt hitastig jafnvel. Arnar var spurður að því hvort hitastigið hafi jafnvel verið of hátt.

„Nei, mér fannst mjög skemmtilegt. Það var dæmt mjög mikið í byrjun og svo of lítið. Það er kannski það helsta.“

Fannst Arnari skrýtið hvernig munaði á dómgæslunni.

„Það munaði ekki á dómgæslunni á milli liða. Það var bara mismunandi á hvað var dæmt. Þeir náðu stórum dómum í restina sem var mjög vel gert og þeir áttu hörkuleik dómararnir. Það er alltaf eitthvað. Svo fer maður heim og horfir á þetta og áttar sig á því að maður er fáviti.“