Fjölnir vann fyrsta leikinn

Brynjar Óli Kristjánsson var hetja Fjölnismanna en hann skoraði sigurmarkið í leiknum og tryggði Fjölni 24-23 sigur.

Aðalsteinn Örn Aðalsteinsson var markahæstur hjá Fjölni með sjö mörk en Ari Magnússon skoraði fjögur mörk. Ísak Logi Einarsson og Benedikt Marinó Herdísarson voru markahæstir hjá Stjörnunni með fjögur mörk hvor.

Stjarnan var 13-12 yfir í hálfleik og var þremur mörkum yfir, 18-15, þegar átján mínútur voru eftir.

Grafarvogspiltar voru aftur á móti sterkari á lokasprettinum og náðu yfirhöndinni í þessu einvígi.

Stjörnumenn skiptu um þjálfara fyrir leikinn þegar þeir létu Hrannar Guðmundsson fara en þeim Sverri Eyjólfssyni og Tandra Má Konráðssyni tókst ekki að vinna fyrsta leikinn.

Fjölnir getur nú tryggt sig inn í úrslitaeinvígi með sigri á heimavelli í næsta leik.

Grótta og Hörður áttu að byrja sitt einvígi í kvöld en leiknum var frestað fram á sunnudaginn.