Tiger Woods er ó­meiddur en keyrði undir á­hrifum

Á blaðamannafundi sagði lögreglustjóraembættið að Woods hefði sýnt merki um ölvun á slysstað og verið handtekinn.

Hann slasaðist ekki í slysinu, að sögn lögreglumannanna. ABC segir frá.

Lögreglustjóraembættið sagði að Woods hefði samþykkt að fara í öndunarpróf sem sýndi ekkert áfengi í líkama hans, en neitaði að fara í þvagprufu, sem er notuð til að greina lyf eða lyfseðilsskyld lyf.

Auk þess að vera ákærður fyrir akstur undir áhrifum með eignatjóni var Woods ákærður fyrir að neita að gangast undir löglegt próf. Hvort tveggja eru minni háttar brot.

Kylfingurinn slasaðist alvarlega í slysi árið 2021 sem varð í Suður-Kaliforníu.

Jeppinn sem hann ók, Genesis GV80 árgerð 2021, fannst nokkrum metrum frá miðeyjunni, á svæði þar sem slys voru „mjög tíð“, að sögn yfirvalda á þeim tíma.

Yfirvöld sögðu engar sannanir um ölvun í því slysi og bættu við að slysið hefði verið „hreint og klárt slys“.

Eftir slysið sagði Woods í viðtali við Golf Digest að hann hefði hafið endurhæfingu sem fól í sér þrjá mánuði í sjúkrarúmi á heimili sínu.