Sigurður Ís­lands­meistari í snóker í fyrsta sinn

Úrslitaleikur Íslandsmótsins fór fram á Billiardbarnum en þar mætti Sigurður ríkjandi Íslandsmeistaranum, Þorra Jenssyni. Þeir áttust við í úrslitum fyrir ári síðan og þar hafði Þorri betur en nú var komið að Sigurði sem fagnaði sínum fyrsta Íslandsmeistaratitli.

Úrslitaleikurinn var bráðfjörugur og spennandi.

Þorri byrjaði mjög vel og komst í 3-0 áður en Sigurður tók við sér. Það gerði Sigurður reyndar af fítonskrafti því hann vann næstu fjóra ramma og komst 3-4 yfir.

Þorri svaraði hins vegar með því að jafna 4-4 en Sigurður var ekki hættur og komst í 4-6 og dugði því að vinna einn ramma í viðbót til að fagna sínum fyrsta Íslandsmeistaratitli.

Þorri byrjaði 11. rammann mjög vel og vantaði í raun bara herslumuninn á að vinna rammann. Sigurður svaraði hins vegar stórkostlega og var kominn yfir en forhleypti af svörtu og gaf því Þorra tækifæri á ný. Hann tók það og minnkaði muninn í 5-6.

En í lokarammanum náði Sigurður fljótlega undirtökunum og þrátt fyrir að Þorri hafi ekki gefið neitt eftir, þá hafði Sigurður að lokum sigur og er því Íslandsmeistari í snóker 2026.

Úrslitaleikurinn var einstaklega vel leikinn, fjögur stuð yfir 50 stig sem er ekki lítið þegar barist er um stærsta titilinn.

Sigurður er vel að sigrinum kominn enda hefur hann verið einn af bestu snókerspilurum landsins undanfarin ár. Eina sem vantaði hjá honum er að koma höndum á Íslandsmeistaratitilinn en nú er sá sigur í höfn og sjálfsagt eiga titlarnir eftir að verða fleiri.