Vann fyrsta titilinn eftir að­gerð á heila: „Ég var ekki einn í dag“

Woodland lék samtals á 21 höggi undir pari á Houston Open og var fimm höggum á undan Dananum Nicolai Højgaard.

Áhorfendur á Memorial Park-golfvellinum studdu vel við bakið á Woodland og kölluðu nafn hans þegar hann var á lokaholunni.

Eftir að hafa sett niður pútt fyrir pari horfði hann til himins og tárin runnu niður kinnar hans þegar hann faðmaði eiginkonu sína.

„Við keppum í einstaklingsíþrótt en ég var ekki einn í dag,“ sagði Woodland eftir mótið. „Allir sem eru að glíma við eitthvað, ég vona að þeir sjái mig og gefist ekki upp. Haldið áfram að berjast.“

Woodland hefur svo sannarlega þurft að glíma við sinn skerf af mótlæti. Í september 2023 gekkst hann undir aðgerð þar sem æxli var fjarlægt úr heila hans.

Woodland sneri aftur á völlinn og varð meðal annars í 2. sæti á Houston Open í fyrra. En hann glímdi við áfallastreituröskun og greindi frá þeirri baráttu í viðtali við Golf Channel fyrir tveimur vikum.

Þurfti að hjálpa sjálfum sér

„Ég er þakklátur fyrir hugulsemina og stuðninginn. En innra með mér líður mér eins og ég sé að deyja og ég lifi í lygi. Ég vil að draumar mínir rætist og ég njóti velgengni. Ég vil líka hjálpa fólki en átta mig núna á því að ég þarf að hjálpa sjálfum mér fyrst,“ sagði Woodland.

Sigur hans á Houston Open var hans fyrsti á PGA-móti síðan hann vann Opna bandaríska í júní 2019, eða fyrir tæpum sjö árum.

Með sigrinum á Houston Open vann Woodland sér inn þátttökurétt á Masters sem fer fram 9.-12. apríl næstkomandi.