Fékk leyfi til að fara í með­ferð utan Banda­ríkjanna

Tiger tilkynnti fyrr í dag að hann myndi ekki taka þátt á Masters-mótinu um næstu helgi. Hann er kominn í ótímabundið frí frá golfi eftir að hafa valdið bílslysi um síðustu helgi og ætlar ekki að baða sig í sviðsljósinu á næstunni.

Lyfseðilsskyld verkjalyf fundust á Tiger þegar hann var handtekinn eftir bílslysið og hann er ákærður fyrir akstur undir áhrifum.

Tæknilega séð þurfti Tiger samt ekki að sækja um leyfi til að fara úr landi en lögmaður hans gerði það í þágu gagnsæis.

Dómarinn veitti leyfið og Tiger er frjálst að ferðast í meðferðarúrræði erlendis. Lögmaðurinn sagði það nauðsynlegt til að tryggja friðhelgi einkalífs Tigers.

Tiger hafði gefið í skyn en ekki staðfest þátttöku sína á Masters-mótinu sjálfu, sem fer fram næstu helgi. Hann hafði hins vegar staðfest komu sína í kvöldverðinn og á sýningarviðburð sem fer fram sömu helgi á Augusta golfvellinum, en fyrr í dag tilkynnti mótsstjórinn að Tiger myndi ekki mæta.