Haf­þór ætlar að slá tvö heims­met í sömu vikunni

Hafþór hafði fyrir löngu gefið það út að hann ætlaði að keppa á Steraleikunum í Las Vegas 24. maí næstkomandi þar sem stefnan hefur verið sett á heimsmet í réttstöðulyftu, met sem hann hefur bætt nokkrum sinnum á síðustu árum.

Það er hins vegar ekki eina heimsmetið sem Hafþór ætlar sér að bæta í vor.

Aflaunamótið Swaglift Day í Liberec í Tékklandi auglýsir mótið með því að segja að íslenska fjallið ætli að vera með í ár. Mótið fer fram 30. maí eða aðeins sex dögum eftir að Hafþór Júlíus keppir í sýningargrein á Steraleikunum hinum megin við Atlantshafið.

Á Steraleikunum ætlar Hafþór að bæta heimsmetið í einstæðri réttstöðulyftu en tæpri viku síðar ætlar hann sér nýtt heimsmet í endurtekinni réttstöðulyftu, „deadlift for reps“ eins og það er kallað á enskri tungu.

Í Tékklandi ætlar Hafþór að fara upp með 400 kíló oft og mörgum sinnum en í Las Vegas er stefnan sett að fara upp með meira en 510 kíló í einni réttstöðulyftu sem er heimsmet hans sjálfs frá því í fyrra.

„Þór er heimsþekkt goðsögn, bókstaflegt fjall bæði í íþróttum og afþreyingu og við erum himinlifandi með að hann taki þátt í leikunum,“ sagði Maxmillian Martin, forstjóri Steraleikanna, þegar þátttaka Hafþórs var staðfest.

„Það eru mjög fáir – ef einhverjir – á þessari plánetu sem jafnast á við hreinan styrk Þórs og þá sjón sem aðeins hann getur skapað fyrir áhorfendur um allan heim,“ sagði Martin.

Hafþór er 37 ára gamall og ekki aðeins afreksmaður í kraftakeppnum heldur heimsfrægur leikari þökk sé leik sínum í Game of Thrones-þáttunum en þar túlkaði hann Ser Gregor „Fjallinu“ Clegane í hinum margverðlaunuðu HBO-þáttum.

Á heimsmeistaramótinu í réttstöðulyftu 2025 í Birmingham á Englandi lyfti Hafþór 510 kílóum og sló þar með heimsmetið í réttstöðulyftu, en hann bætti þar eigið met upp á 505 kíló og varð fyrsti og eini maðurinn í sögunni til að lyfta meira en 500 kílóum þrisvar sinnum.

Hafþór er einnig eini maðurinn sem hefur náð hinni eftirsóttu þreföldu kórónu í kraftakeppnum, en hann sigraði í keppnunum Sterkasti maður heims (WSM), Arnold Strongman Classic (ASC) og Sterkasti maður Evrópu (ESM) á sama árinu (2018).

Það verður mikið álag á Hafþóri í næsta mánuði en hann hefur leyft fylgjendum sínum að fylgjast með undirbúningi sínum á samfélagsmiðlum eins og sjá má hér fyrir neðan.