Símabannið bitnaði illa á goð­sögn

Hinum 65 ára gamla Mark Calcavecchia var nefnilega vísað í burtu af Augusta-vellinum, samkvæmt bandarískum fjölmiðlum, vegna símanotkunar á þriðjudaginn.

Calcavecchia nýtur mikillar virðingar enda sigursæll á sínum tíma þó að honum hafi ekki tekist að vinna Masters. Hann komst næst því árið 1988 þegar hann endaði í 2. sæti en vann svo Opna breska meistaramótið ári síðar. Þá var hann fjórum sinnum í Ryder-bikarliði Bandaríkjanna og vann alls 13 mót á PGA-mótaröðinni.

Og þó að Calcavecchia væri mættur sem heiðursgestur, sem sigurvegari á risamóti, þá var honum ekki sýnd nein miskunn þegar hann sást taka upp símann sinn á þriðjudaginn. Öryggisverðir vísuðu honum af svæðinu, samkvæmt til að mynda USA Today og Golfweek.

Þegar Golfweek náði sambandi við Calcavecchia vildi hann ekkert tjá sig en hafnaði ekki innihaldi fréttarinnar. „Ég hef ekkert neikvætt að segja um Augusta National golfklúbbinn og Masters, svo ég held að við ættum bókstaflega að leggja á núna,“ hafði miðillinn eftir kylfingnum. Hann spilaði alls 18 sinnum á Masters á árunum 1987 til 2008.

Símabannið á Augusta-vellinum gildir fyrir alla, jafnvel fjölmiðlafólk, og á einnig við um fartölvur og spjaldtölvur. Með þessu á að halda í sama andrúmsloft og hefur ríkt á Masters í svo mörg ár.

Ríkjandi meistari, Rory McIlroy, og Sam Burns léku best allra á fyrsta degi Masters í gær og eru á -5 höggum. Þeir hafa tveggja högga forskot á Kurt Kitayama, Jason Day og Patrick Reed fyrir hring dagsins.

Masters-mótið er í beinni útsendingu á Sýn Sport alla helgina. Útsending frá öðrum keppnisdegi mótsins hefst klukkan 17:00 í dag.