Hinn grunaði ný­lega hand­tekinn eftir á­rás á þorra­blóti

Þrír voru handteknir í aðgerðum lögreglu í gær sem tengjast grun lögreglu um smygl á fíkniefnum í vökvaformi til Íslands í gámi um borð í Dettifossi, gámaflutningaskipi Eimskips. Lögregla var með viðveru á lokuðu svæði Eimskips í Sundahöfn í gær og handtók um svipað leyti þrjá karlmenn á fertugsaldri.

Allir eiga sér nokkra sögu hjá lögreglu. Tveir hafa verið látnir lausir en lögregla ákvað að fara fram á vikulangt gæsluvarðhald yfir hinum þriðja á grundvelli rannsóknarhagsmuna. Hann var leiddur fyrir dómara í Héraðsdómi Reykjavíkur upp úr hádegi í dag þar sem dómari féllst á kröfu lögreglu um varðhald.

Lögregla heldur þétt að sér spilunum við rannsókn málsins. Auk handtöku mannanna þriggja réðst hún í húsleit í gær á heimili karlmannsins sem sætir gæsluvarðhaldi. Um er að ræða einbýlishús þar sem samkvæmt heimildum fréttastofu var lagt hald á fjölda muna, allt frá reiðhjólum til armbandsúra.

Lögregla hefur staðfest að málið sé til rannsóknar en hefur ekki viljað gefa upp eða staðfesta aðra þætti málsins. Samkvæmt heimildum fréttastofu er um að ræða fíkniefni á vökvaformi en fréttastofa hefur ekki upplýsingar um magn eða tegund hinna meintu fíkniefna.

Karlmaðurinn sem sætir gæsluvarðhaldi var handtekinn í lok janúar grunaður um að hafa slegið gest á þorrablóti HK í Kórnum í Kópavogi bylmingshöggi í höfuðið. Málið var rannsakað sem alvarleg líkamsárás og sætti karlmaðurinn gæsluvarðhaldi í tvo daga vegna rannsóknar lögreglu. Sá sem varð fyrir árásinni var liggjandi á sjúkrahúsi í nokkrar vikur eftir árásina en um er að ræða þriggja barna föður á fimmtugsaldri.