„Það sem þær fengu var svo­lítið það sem við gáfum þeim“

„Við sköpuðum færi en hefðum kannski getað skorað meira. Það sem þær fengu var svolítið það sem við gáfum þeim útfrá okkar mistökum,“ sagði Guðrún eftir leik.

Ísland hins vegar stjórnaði leiknum nánast allan tímann og það var því ekki mikið að gera varnarlega hjá íslenska liðinu.

„Boltinn rúllaði hratt og við bjuggumst kannski við þeim aðeins meira aggressívari en þær voru. Þetta gekk fínt þegar við héldum rónni og héldum í boltann og vorum að skipta á milli kanta.“

Íslenska liðið gerði vel sóknarlega og fengu heilmikið af færum en tókst því miður ekki að bæta við fleiri mörkum.

„Við fengum færi í fyrri hálfleik þar sem við fengum marga krossa inn og það þurfti bara að ná að reka tánna í boltann og setja hann inn. Það var því rosalega gott að koma út í seinni og fá markið því við ætluðum okkur sigur. Hefði þó jafnvel viljað fá fleiri.“

Ísland mætir enska landsliðinu næstkomandi laugardag á Laugardalsvelli. Sá leikur verður að eitthverju leyti nokkuð frábrugðin þeim leik í kvöld gegn Úkraínu.

„Það verður hörku leikur en ég held að við séum búin að læra heilmikið úr síðasta Englands leik. Við ætlum að reyna að gera þeim svolítið erfitt fyrir. Við vorum í ágætis séns í síðasta leik lengi vel, við vorum 1-0 undir og Sandra átti skalla sem var varinn vel. Við erum því alveg með tækifæri og ef við stígum aðeins upp í að halda í boltann og aðeins aggressívari í varnarleiknum þá held ég að við eigum alveg möguleika. Við ætlum inn í þennan leik til þess að fá eitthvað út úr honum.“

„Á móti Englandi erum við meira í varnarfærslunum en við verðum líka að ná að þora að halda í boltann þegar við vinnum hann. Það er kannski okkar challenge á móti bestu liðunum að við séum ekki hræddar við að halda í boltann og skapa eitthvað úr því þegar við fáum tækifæri til þess.“