Hulda Clara fer frá­bær­lega af stað í atvinnumennskunni

Hulda er á sínu fyrsta tímabili í atvinnumennsku og stefnir á að komast inn á LET mótaröðina, þó LPGA sé draumurinn til lengri tíma litið.

Hún lék hringina þrjá á 72-73-71 höggi og lauk leik á pari í heildina.

Eftir fyrsta hringinn var hún á pari og jöfn í ellefta sæti mótsins. Annar hringurinn hófst illa því Hulda fékk tvo skolla á fyrstu sex holunum en lék síðustu tólf holurnar á einu höggi undir pari.

Þriðji og síðasti hringurinn varð síðan sá besti hjá Huldu en þar endaði hún einu höggi undir pari, eftir þrjá fugla og tvo skolla.

Par 5 holurnar reyndust Huldu vel á þessu móti en þar fékk hún fimm fugla af sex mögulegum.

Andrea Bergsdóttir og Ragnhildur Kristinsdóttir voru einnig á meðal keppenda mótsins og náðu báðar í gegnum niðurskurð.

Andrea lék sína hringi á 79-72-69 höggum og endaði jöfn í 29. sæti mótsins.

Ragnhildur lék hringi sína á 77-74-72 höggum, lauk leik á sjö yfir pari í heildina og endaði í 42. sæti mótsins.