Urðu eftir í Flat­ey á meðan Baldur sigldi suður

„Þessir starfsmenn hefðu svo sannarlega nýtt sér ferðina í gær ef þeir hefðu vitað að það ætti ekki að sigla í dag. Þeir vissu auðvitað ekkert að þetta stæði til enda er aldrei haft samráð við okkur,“ segir Gerður Björk Sveinsdóttir bæjarstjóri Vesturbyggðar í samtali við Vísi.  

Hún segir ákvörðunina hafa verið tekna með engum fyrirvara seint í gærkvöldi. „Við lásum bara um þetta í fréttamiðlum, við fengum enga tilkynningu fyrr en daginn eftir þegar sveitarstjóri Reykhólahrepps kvartaði til Vegagerðarinnar.“

Tilkynnt var seint í gærkvöldi að Baldur sem allajafna siglir áætlunarsiglingum um Breiðafjörð, verði send til Vestmannaeyja tímabundið vegna slæms ástands í Landeyjahöfn. Mikið rót hefur verið á samgöngum til Vestmannaeyja eftir að bilun kom upp í Herjólfi og í dæluskipi í Landeyjahöfn þannig að Herjólfur hefur siglt lengri leið til Þorlákshafnar á einni vél.

Samkvæmt upplýsingum frá Orkubúi Vestfjarða eru starfsmennirnir í Flatey við vinnu í  orkuskiptaverkefni. Þeir hafi átt að koma aftur til lands á morgun en verði reddað í land með trillu annað kvöld. Samkvæmt upplýsingum frá Ferjuleiðum, sem gera út Baldur, var áætlunarsigling til Flateyjar á dagskrá á morgun föstudag, en ekki í dag fimmtudag. Öllum farþegum hafi verið endurgreitt og farþegum í Flatey reddað í land með öðrum hætti.

Lausn sem enginn sé sáttur við

Gerður gerir málinu skil í Facebook færslu og tekur fram að hún hafi mikla samúð með Eyjamönnum, en bendir á að Baldur sé ekki lausnin. Hún segir óásættanlegt að Baldur sé tekinn aftur og aftur úr siglingum yfir Breiðafjörð eins og hann skipti engu máli. Um er að ræða annað skiptið á stuttum tíma sem Baldur er sendur suður. Gerður segir þetta fela í sér mikið óhagræði og mikinn kostnað og bendir hún meðal annars á ferðalög með afurðir til Vestfjarða sem taki nú mun lengri tíma en ella.

En hvað er til ráða?

„Það þarf að vera hægt að stóla á plön og Herjólfur þriðji sem hefur legið í Sundahöfn er mun hentugra skip sem varaferja fyrir Herjólf. Vestmannaeyingar hafa kallað eftir því og mér skilst að það sé í vinnslu, en að hann sé ekki haffær sem stendur, en að það standi til bóta. Það er lausnin sem við höfum bent á, því Baldur hentar ekki í siglingar á milli Þorlákshafnar og Vestmannaeyja, hann tekur of fáa farþega og of fáa bíla, hann hentar mikið betur á Breiðafirði. Þetta er lausn sem enginn er ánægður með, hvorki við né Vestmannaeyingar.“

Fréttin hefur verið uppfærð með nánari upplýsingum frá Ferjuleiðum.