Trúin og traustið innan hópsins eigi eftir að skila liðinu á­fram

Njarðvík tapaði fyrir Haukum í oddaleik um Íslandsmeistaratitilinn fyrir ári síðan. Einar telur að sú reynsla gæti skipt sköpum.

„Við erum náttúrulega með ungar stelpur sem eru búnar að öðlast mikla reynslu í gegnum úrslitakeppnina í fyrra sem að mun pottþétt telja í kvöld. Ég held að það sé engin spurning og svo er það bara þannig að við viljum endurtaka leikinn og fara í þessa baráttu við Hauka og það er mikill hvati fyrir okkur að fara inn í þennan leik í kvöld,“ segir Einar en liðið sem vinnur í kvöld mætir Haukum í úrslitaseríunni.

Njarðvík tapaði fyrstu tveimur leikjunum í seríunni en vann síðan næstu tvo.

„Ég held að það sé svona í einfaldleikanum hægt að horfa bara í ákefðina í varnarleiknum í síðari hálfleik, leik í síðasta leik og byggja ofan á það, halda í hraðann sóknarlega. Ef við einföldum þetta, að þetta séu svona tveir þættir sem við þurfum að ríghalda í. En svo er þetta bara klassískur, þú veist, 40 mínútna leikur sem býður upp á alls konar og mótlæti verður þar á meðal og trúin og traustið innan okkar hóps, bara liðsheildin sem slík. Ég er sannfærður um að þessi eining eigi eftir að skila sigri í hús í kvöld.“