Jenner segist hafa veikst af Ozempic

Jenner og dætur hennar hafa líkt og margir aðrir í Hollywood farið ýmsar leiðir til að halda sér ungum og mjóum, má þar helst nefna ógrynni lýtaaðgerða til að breyta andlitum sínum og líkamsbyggingu. Jenner vakti mikla athygli í fyrra eftir að hafa farið í umfangsmikla lýtaaðgerð á andliti sínu.

Kris Jenner var í vikunni gestur í hlaðvarpinu SHE MD, sem læknirinn Thais Aliabadi og heilsugúrúinn Mary Alice Haney halda úti, og ræddi þær um heilsu sína, lyfjanotkun og útlit.

Þar sagðist Jenner hafa prófað þyngdarstjórnunarlyfið Ozempic en ekki fílað það. „Ég prófaði það einu sinni þegar enginn vissi hvað það var og varð virkilega veik af því,“ sagði hún í hlaðvarpinu.

Meðan hún var á lyfinu hafi henni liðið eins og hún gæti ekki unnið vegna ógleði og því ákveðið, í samráði við sérfræðing sinn í þessum málum, að prófa eitthvað annað. 

„Ég uppgötvaði að peptíð-sprautur virkuðu mjög vel fyrir mig og svo fylgi ég því eftir með bætiefnum,“ sagði hún. Þess má geta að þyngdarstjórnunarlyf á borð við Ozempic og Wegovy eru í raun peptíð, það er þau innihalda semaglútíð í flokki glúkagonlík-peptíðs-1.

Sprautanleg peptíð hafa verið mikið til umræðu upp á síðkastið en um er að ræða stuttar lengjur amínósýra sem tengjast saman með peptíðsýrum og virka sem boðefni, hormón eða sem hluti af stærra próteini. Notkun ólöglegra peptíða hefur færst sérstaklega í aukana og hafa þau mismunandi virkni eftir tegundum.

Til viðbótar við peptíðin hafi hún byrjað að neyta bæði lýsis og ómega-3 fitusýra. „Það var algjör leikbreytir,“ sagði Jenner í viðtalinu. „Það gaf mér nokkra aukalega klukkutíma á nóttu því ég vakna svo snemma.“