Dag­bjartur og Gunn­laugur spila um sæti á risamóti

Greint er frá stöðunni á vefsíðu Golfsambands Íslands í dag en lokaúrtökumót dagsins fer fram á The Lakes Golf & Country Club vellinum í Westerville í Ohio í Bandaríkjunum. Um er að ræða síðustu hindrunina í átt að þátttöku á risamótinu. 

Það mun reyna á kylfingana sem taka þátt á mótinu því spilaðar eru 36 holur á einum og sama deginum. Alls fara fram tíu úrtökumót viðsvegar um Bandaríkin og Kanada í dag. PGA kylfingar, aðrir atvinnukylfingar og fremstu áhugakylfingar heims berjast um þátttökurétt á risamótinu og aðeins efstu kylfingar tryggja sér sæti á Opna bandaríska meistaramótinu. 

Á lokaúrtökumótinu sem Dagbjartur og Gunnlaugur taka þátt í eru það fjórir efstu kylfingarnir sem tryggja sér þátttökurétt á Opna bandaríska meistaramótinu. 

Dagbjartur vann sér inn þátttökurétt á umræddu lokaúrtökumóti með frábærri spilamennsku í Pittsfield á dögunum þar sem að hann endaði jafn í öðru sæti mótsins. 

Gunnlaugur Árni þurfti ekki að fara í gegnum undankeppni í átt að lokaúrtökumótinu. Góð staða hans á heimslista áhugakylfinga, þar sem að hann vermir sautjánda sætið, tryggði honum þátttökurétt á mótinu. 

Gunnlaugur hefur leik á lokaúrtökumótinu klukkan 12:12 að íslenskum tíma í dag og Dagbjartur nokkrum mínútum seinna, eða klukkan 12:36. Hægt er að fylgjast með framvindu mála á mótinu hér.