Konukot og börn í brottfararstöð í brenni­depli í kvöld­fréttum

Sprengjum rigndi á víxl í Ísrael og Íran í gærkvöldi og nótt en það sem af er degi hafa engar fregnir borist af árásum en Bandaríkjaforseti sendi þeim tóninn í morgun. Við förum yfir þróunina í kvöldfréttum og hlýðum á sjónvarpsávarp forsætisráðherra Ísraels.

Bæta ætti þjónustu við konur sem leita sér aðstoðar í Konukoti í Ármúla fremur en að skrímslavæða þær í fjölmiðlum. Þetta segir framkvæmdastjóri Rótarinnar sem fullyrðir að fréttaflutningur af ófremdarástandi í götunni standist ekki skoðun.

Við verðum í beinni útsendingu frá Alþingi þar sem Evrópumálin hafa verið fyrirferðarmikil og ræðum við þingflokksformenn um þinglokasamninga. Við sýnum myndefni frá brunavettvangi í Álfsnesi þar sem timburkurlari brann til kaldra kola en talsmenn Sorpu meta tjónið á hundrað milljónir og hafa ekki minnstu hugmynd um hvernig kviknaði í. Þá verðum við í beinni útsendingu frá Listahátíð í Reykjavík sem er í fullum gangi.

Og í sportpakkanum segjum við frá því að Knattspyrnudeild Víkings nýtti sér undanþágu frá KSÍ til að sækja sér reynslubolta í markið. Ögmundur Kristinsson kveðst hungraður í titla.

Emil Pálsson, sem lagði knattspyrnuskóna á hilluna eftir að hafa í tvígang farið í hjartastopp, telur sömu spurningar nú vera uppi hjá Christian Eriksen sem hneig niður í annað skipti með danska landsliðinu í gær. Meira um málið í sportpakka kvöldsins.

Í Íslandi í dag hittum við vini og samstarfsfélaga sem létu drauminn rætast og stofnuðu eigið snyrtivörufyrirtæki. Þetta og margt fleira á samtengdum rásum Sýnar, Vísis og Bylgjunnar á slaginu 18:30.