„Sá að hann hleypti mér á hægri löppina og ég hikaði ekki við að skjóta“

„Þetta var rosalegur leikur“ sagði Kjartan Kári Halldórsson leikmaður FH eftir sigurinn í dag.

„Þetta var mikið hlaup og völlurinn var erfiður, hann var þungur en við vorum bara flottir og börðumst fyrir hvorn annan og loksins datt þetta okkar meginn í þetta skiptið“

„Við erum búnir að sýna góðar frammistöður upp á síðkastið og mér finnst úrslitin í síðustu leikjum ekki hafa verið sanngjörn og loksins kom sigurinn“

Sigurinn í dag var sá fyrsti í deildinni hjá FH og var hann kærkominn en þó vildi Kjartan Kári ekki endilega meina að þungu fargi væri létt af liðinu.

„Já þetta var svolítið kærkomið. Við erum búnir að vera að ég myndi segja óheppnir en það er bara geggjað að fá fyrsta sigurinn“

„Við vorum alls ekki þungir, við vorum bara svolítið slakir inn á milli og þegar þú slekkur á þér í þessari deild í 30 sekúndur þá er þér refsað en núna vorum við klárir í 90+ mínútur og það skilaði okkur sigri“

Kjartan Kári skoraði annað mark leiksins og það var frábært mark utan af velli sem var óverjandi fyrir markvörð Keflavíkur sem kom engum vörnum við.

„Ég hef gert þetta nokkrum sinnum og ég sá að hann hleypti mér á hægri löppina og ég hikaði ekki við að skjóta og loksins endaði hann inni“

Aðspurður um hvað það væri sem skildi á milli fannst honum liðsheildin skila sínu.

„Við vorum mjög flottir í fyrri hálfleik. Við vorum að haupa mikið og við vorum að vinna seinni boltana“

„Við slökktum á okkur kannski inn á milli þegar þeir ná að stjórna leiknum í fyrri hálfleik og síðan í seinni hálfleik þá fannst mér við bakka aðeins of mikið niður en það sýndi bara eljuna að við fögnum öllu þegar við hendum okkur fyrir skot og ég myndi bara segja liðsheildin sem að skilaði í dag “

Er þetta vendipunkturinn hjá FH?

„Ég ætla ekki að segja neitt en það er gott að fá sigurinn og núna þurfum við bara að byggja á þessu“ sagði Kjartan Kári Halldórsson.