Segir raun­hæft að Þjóðarhöllin verði risin árið 2030

„Ég held að þetta verði alveg geggjað sko,“ segir Helgi Geirharðsson, verkefnastjóri Þjóðarhallar, þegar rýnt var í nýju teikningarnar í Sportpakka Sýnar í gærkvöldi.

„Aðkoman hérna frá Borgarlínustöðinni sem verður hérna fyrir ofan, frá göngustígunum og hjólastígunum hérna beint inn á þriðju hæðina sem verður aðalmóttakan… Þetta gæti orðið ansi skemmtileg miðstöð fyrir fólk að hittast og fylgjast með íþróttum.“

Komandi Þjóðarhöll sækir fyrirmynd sína erlendis, frá Þrándheimi í Noregi.

„Þau byggðu nýlega samskonar concept,“ segir Helgi um Trondheim Spektrum.

„Tilbúið upp úr áramótum 2030“

Stóra spurningin er svo hvenær þetta mikla mannvirki mun rísa. Upphaflega átti Þjóðarhöllin að vera tilbúin árið 2025 en verkefnið reyndist tímafrekara. Nú er stefnan sett á árið 2030, rétt í tæka tíð fyrir HM í handbolta sem á að halda í nýju Þjóðarhöllinni árið 2031.

„Við teljum að það sé ekki bjartsýnt að þetta sé tilbúið upp úr áramótum 2030. Það er alveg eðlilegur tími og í rauninni vel innan allra marka, miðað við framkvæmdatíma á sambærilegum mannvirkjum erlendis,“ segir Helgi.