Eins og Tiger Woods myndi mæta á meistaramótið í Mos­fells­bæ

The Rift verður haldið í sjöunda sinn á Hvolsvelli helgina 17. - 18. júlí og metþátttaka er í ár. Í fyrsta sinn býður keppnin upp á fjórar leiðir, frá 60 km upp í 330 km, sem gerir fleiri hjólreiðamönnum kleift að upplifa hálendið og einstaka náttúru Íslands.

Um þúsund keppendur eru skráðir til leiks en hverjum keppenda fylgir einn eða tveir aðstoðarmenn. Búist er því við um 2.500 manns á Hvolsvelli um helgina, að langstærstum hluta erlendis frá. Hjólað er frá Hvolsvelli, undir Heklurætur, upp Krakatind og Fjallabak, og endað aftur á Hvolsvelli.

Meðal þátttakenda í ár er Nino Schurter, margfaldur heimsmeistari og Ólympíumeistari í fjallahjólreiðum, sem er af mörgum talinn einn besti fjallahjólreiðamaður allra tíma.

Dana Rún Hákonardóttir, ein af skipuleggjendum The Rift, greindi frá því í Bítinu á Bylgjunni að Schurter hefði sjálfur boðað komu sína.

„Þetta var mjög tilviljanakennt. Ég fékk tölvupóst frá Nino Schurter og ég, sem kem ekki úr þessum keppnishjólreiðageira, spyr yfirmenn mína um hann. Benni, sem stofnaði Rift, fór alveg upp á afturfæturna og var bara: „Hvað ertu að segja?“. Þá er þetta auðvitað bara einn besti hjólreiðamaður allra tíma,“ sagði Dana Rún létt í bragði.

„Þetta er bara eins og ef Tiger Woods myndi mæta á meistaramótið í Mosfellsbæ“ sagði Sigmar Vilhjálmsson þá.

„Þetta er þannig. Þetta er alveg risastórt dæmi. Hann er semsagt fjallahjólreiðamaður en lagði þá skó á hilluna síðasta sumar. Nú ætlar hann að leika sér í malarhjólreiðum og byrjar hér á Íslandi,“ sagði Dana og hún telur þátttöku Schurter eiga eftir að gera The Rift að enn eftirsóttari viðburði.