Hafði aldrei komið til Evrópu en nú er hann efstur á Opna breska

Fyrir fimm dögum hafði Suber aldrei einu sinni komið til Evrópu en ef marka má fyrstu kynni er óhætt að gera ráð fyrir að hann sé himinlifandi með sína fyrstu reynslu af Evrópu.

Bandaríkjamaðurinn kom í fyrsta sinn til Evrópu þegar hann mætti til að undirbúa sig fyrir sína fyrstu þátttöku á Opna breska.

Eftir frábæran fyrsta hring þar sem hann spilaði á 65 höggum, eða fimm höggum undir pari, hélt hann hins vegar aftur í klúbbhúsið sem efsti maður og á undan stórstjörnum íþróttarinnar á borð við ríkjandi meistara Scottie Scheffler, Bryson DeChambeau og Rory McIlroy. DeChambeau er á þremur höggum undir pari, Scheffler er á tveimur höggum undir pari en McIlroy er á tveimur höggum yfir pari eftir erfiðan dag.

Suber endaði hringinn á tveimur fuglum og einum erni á síðustu fimm holunum.

Næstu menn eru einu höggi á eftir Suber en það eru Englendingurinn Daniel Brown og Suður-Kóreumaðurinn Sungjae Im sem léku á fjórum höggum undir pari. Það eru síðan níu kylfingar jafnir í fjórða til tólfta sæti á þremur höggum undir pari.

Eftir fyrstu átján holurnar sagði Suber að auk þess að vera nýr í Evrópu væri hann einnig ókunnugur strandgolfi fyrir þessa viku.

„Þetta er fimmti dagurinn minn hér. Á mánudaginn spilaði ég minn fyrsta hring í strandgolfi, þannig að ég hef spilað 27 holur áður en ég spilaði fyrstu umferðina í dag. Ég hef aldrei komið til Evrópu,“ sagði Jackson Suber.

Hann viðurkenndi að þótt hann væri ekki viss um hvernig hann hefði aðlagast nýju umhverfi sínu svona fljótt hefði formið hans fyrir risamótið haft eitthvað með það að gera.

„Ég er ekki alveg viss, en mér finnst ég bara hafa verið að spila vel síðustu mánuði og veit að góður leikur sér um allt, og treysti kylfuberanum mínum fullkomlega til að ákveða hvert við ætlum að slá,“ sagði Suber.

Suber sagði einnig frá því að hann hefði undirbúið sig fyrir hina einstöku áskorun strandgolfs með því að horfa á YouTube-myndband af Royal Birkdale-golfvellinum.

„Ég held ég hafi horft á YouTube-myndband um hverja holu á Birkdale á föstudaginn í síðustu viku eða fimmtudaginn, en fyrir utan það, já, bara – ég er með tölfræðing sem hefur auðvitað hjálpað mér, svo ég veit bara að pottglompurnar eru slæmar og maður á að halda sig frá þeim,“ sagði Suber.