Björgunar­sveitir sinntu tveimur slösuðum ferða­mönnum

Annar ferðamaðurinn hafi hrasað illa á göngu við Hafragilsfoss skammt frá Dettifossi. „Ljóst var í upphafi að nokkuð verkefni væri að koma sjúkling úr gilinu sem hann var í og var jafnframt óskað eftir þyrlu Landhelgisgæslu í verkefnið,“ segir í tilkyninngu frá Slysavarnarfeáginu Landsbjörg.

Björgunarsveitir frá Reykjadal, Laugum, Húsavík, Kópaskeri, Mývatni og Akureyri hafi verið kallaðar út að Hafragilsfossi og voru fyrstu björgunarsveitarliðar komnir á vettvang um fimmleytið síðdegis í dag. 

„Slysstaður var undir háum klettum í nokkuð brattri brekku og þar fyrir ofan var önnur brekka upp á brún, þangað sem ökutæki komust. Sjúklingi var komið fyrir í börum og hann svo hífður upp klettabeltið beint ofan við slysstað, en þar fyrir ofan var hægt að koma sexhjóli.“ 

Klukkan hálfátta hafi manninum verið komið upp á klettabeltið en þar beið hans sjúkrabíll sem flutti hann til aðhlynningar á sjúkrahúsið á Akureyri. Aðgerðum hafi lokið á níunda tímanum í kvöld. 

Samtímis hafi annar ferðamaður í Hrútagili í Skaftafelli verið hífður upp um borð í þyrlu Landhelgisgæslunnar en gilið er erfitt yfirferðar með sjúkrabörur. Björgunarsveitin Kári í Öræfum og bráðaviðbragð Heilbrigðisstofnunar Suðurlands sinntu manninum en aðgerðum á svæðinu lauk rétt fyrir klukkan níu í kvöld.