Snæ­fríður Sól þarf að draga sig úr keppni eftir erfiðan morgun fyrir Ís­lendingana

Guðmundur Leo Rafnsson keppti í 200 metra baksundi í dag og var nálægt sínum besta tíma. Hann synti á 2:01,42 sem er aðeins ellefu hundruðustu frá hans besta tíma. Hann byrjaði sitt sund vel en síðustu ferðina var hann orðinn þreyttur og dróst aðeins aftur úr. Þessi tími var ekki nóg til að koma honum áfram og endaði hann í 33. sæti en heilt yfir var hann sáttur við sundið.

„Mér líður ömurlega í rauninni, þótt þetta hafi verið fínasta sund. Líkaminn er alveg búinn, ég skildi allt eftir í lauginni,“ sagði Guðmundur Leo eftir sundið.

Snæfríður Sól Jórunnardóttir synti 100 metra skriðsund í gær en hún hefur dregið sig úr keppni vegna veikinda. Hún átti eftir að keppa í bæði 200 metra og 50 metra skriðsundi en mun ekki taka þátt í því.

Jóhanna Elín Guðmundsdóttir keppti í 50 metra flugsundi í morgun en náði sér ekki almennilega á strik. Hún endaði í næstsíðasta sæti en þetta var mikilvæg reynsla sem mun koma henni vel. Birgitta Ingólfsdóttir er að keppa í fyrsta sinn á EM og synti 100 metra bringusund í morgun. Þar endaði hún í 42. sæti af 45 keppendum.

Fleiri Íslendingar hefja leik á morgun þar sem Vala Dís Cicero keppir í 200 metra skriðsundi, Birnir Freyr Hálfdánarson í 100 metra flugsundi og Einar Margeir Ágústsson í 200 metra bringusundi.