Höfðu af­skipti af á fjórða tug ung­linga vegna drykkju

„Við vorum auðvitað mjög vel mönnuð, með góða yfirsýn og hérna, þetta gekk bara mjög vel hjá okkur, bæði kvöldið og nóttin,“ segir Jóhann Karl Þórisson aðstoðaryfirlögregluþjónn Lögreglunnar á höfuðborgarsvæðinu.

Lögregla hélt úti töluverðu eftirliti sem beint var sérstaklega að unglingum og ungmennum.

„Við vorum bara með öflugt eftirlit sem beindist sérstaklega að unglingum og unglingadrykkju. Við vorum með gönguhópa, reiðhjólahópa og með dróna á lofti.“

Lögregla hafi haft afskipti og hellt niður áfengi á fjórða tug ungmenna. Í kjölfarið hafi verið haft samband við foreldra ungmennanna.

„Við vorum að hella niður áfengi af krökkunum þegar það fannst. Þetta voru einhver þrjátíu, fjörutíu sem við helltum niður hjá og haft var samband við foreldra. Við stigum inn í hópamyndanir og leystum þær upp eftir fremsta megni og svo vorum við með eftirlit með skemmtistöðum.“

Tveir skemmtistaðir rýmdir og lokað

Greint var frá því í morgun að tveimur skemmtistöðum í miðborginni hefði verið lokað en í ljós kom við eftirlit lögreglu að töluvert af ungmennum undir lögaldri hafði verið saman komin.

„Það voru tveir staðir þar sem talsverður fjöldi krakka undir tuttugu ára aldri var samankominn. Þannig það var bara ekkert um annað að gera en að rýma staðinn og loka þeim.“

Staðirnir hafi ekki verið opnaðir á ný fyrr en í dag en lögregla vilji ekki gefa upp um hvaða staði sé að ræða. Heimildir fréttastofu herma að skemmtistaðurinn og kaffihúsið Prikið á horni Bankastrætis og Ingólfsstrætis hafi verið einn staðanna sem hafi verið lokað og rýmdur.

Einn sendur á slysadeild vegna líkamsárásar

Auk þess voru þrír handteknir í miðbæ Reykjavíkur vegna líkamsárásar í gærkvöldi.

Þrír menn hafi ráðist og eggvopnum og hnúajárni hafi verið beitt. Þolandi hafi verið á slysadeild en var ekki með alvarlega áverka, svo sem stungusár, að sögn Jóhanns.

Eftir að lögreglu var tilkynnt um málið munu allir hlutaðeigandi hafa flúið vettvang. Þrír voru handteknir vegna málsins og sé það í rannsókn. Mennirnir verði yfirheyrðir„einhvern tímann fljótlega,“ segir Jóhann. „Þeir voru væntanlega allir undir einhverjum áhrifum.“