Scheffler tryggði sér 1.200 milljónir og toppaði Tiger

Sindri Sverrisson skrifar 30. ágúst 2026 22:17

Scottie Scheffler með verðlaunagripinn eftir sigurinn í dag. Getty/Kevin C. Cox

Scottie Scheffler undirstrikaði stöðu sína sem besti kylfingur heims í dag þegar hann fagnaði sigri á lokamóti PGA-mótaraðarinnar. Sigri á mótinu fylgir hæsta verðlaunaféð á mótaröðinni eða 10 milljónir dollara, jafnvirði um 1,2 milljarða króna.

Norðmaðurinn Viktor Hovland var með forystuna fyrir lokahringinn í dag en missti hana frá sér og endaði í 2. sæti, eftir að hafa spilað lokahringinn á tveimur höggum yfir pari.

Scheffler var hins vegar sjóðheitur, lék lokahringinn á -4 höggum og endaði samtals á -16 höggum, þremur höggum á undan Hovland.

Scheffler sýndi mjög jafna frammistöðu í gegnum mótið á meðan að keppinautar hans náðu ekki sama stöðugleika.

Það er við hæfi að Scheffler skyldi fagna sigri í úrslitakeppninni eftir að hafa verið með mikla forystu á stigalistanum áður en hún hófst.

Hann hefur nú unnið FedEx-bikarinn tvisvar á ferlinum, eins og Tiger Woods gerði, og aðeins Rory McIlroy hefur unnið oftar eða þrisvar sinnum.

Á ferlinum hefur Scheffler núna unnið samtals 130 milljónir dollara, sem samsvarar um 15,8 milljörðum króna, í verðlaun á PGA-mótaröðinni. Hann komst með sigrinum í dag upp fyrir Tiger Woods sem hafði verið efstur á listanum í 25 ár. Woods safnaði 120 milljónum dollara.

Golf