Land­læknir fellir niður starfs­leyfi sex lækna

Þetta staðfestir María Heimisdóttir landlæknir í skriflegu svari til fréttastofu. Heimildin greindi fyrst frá. Í umfjöllun Heimildarinnar kemur fram að rannsókn blaðsins í samstarfi við erlenda miðla hafi leitt í ljós að mögulega þrettán læknar hafi haldið starfsleyfi sínu hér á landi þrátt fyrir að vera bannað að starfa í öðrum ríkjum Evrópu eða í Bandaríkjunum.

Starfsleyfi takmarkað þótt skilyrði sviptingar voru uppfyllt

María segir í skriflegu svari til fréttastofu að mál þessara þrettán lækna hafi verið til skoðunar innan embættisins síðan að þeim barst listi frá Heimildinni. Hjá sex af þessum læknum var ekki talin þörf á að aðhafast. 

„Í þessum málum var ýmist talið rétt að fella starfsleyfi ekki niður hér á landi, eftir niðurfellingu í öðru landi, eða að ástæðu niðurfellingar í öðru landi var að rekja til niðurfellingar eða afsals starfsleyfis læknis hér á landi, sem síðar hafi verið endurútgefið,“ segir í svarinu.

Í sjö málum taldi embættið rétt að aðhafast. Sex starfsleyfi voru felld niður en í einu tilviki var starfsleyfi takmarkað á grundvelli 3. mgr. 15. gr. laga um landlækni og lýðheilsu. Í þeirri grein er landlækni gert heimilt að takmarka starfsréttindi tímabundið ef skilyrði sviptingar eru fyrir hendi. 

Niðurfelling starfsleyfa var byggð á 7. og 8. mgr. 15. gr. sömu laga en þar segir:

Veikleiki á kerfinu en mál nú í mun betri farveg

Í svarinu segir einnig að samkvæmt upplýsingum embættis landlæknis hafi læknarnir sjö ekki verið við störf á Íslandi þegar rannsókn þeirra hófst. 

„Embætti landlæknis berast tilkynningar um sviptingar og takmarkanir starfsleyfa heilbrigðisstarfsmanna innan EES ríkja í gegnum upplýsingakerfi ESB fyrir innri markaðinn (IMI). Gífurlegur fjöldi slíkra tilkynninga berst öllum EES ríkjum í gegnum það kerfi. Reynst getur eftirlitsstofnunum erfitt um vik að fylgjast með og skrá slíkar tilkynningar með viðeigandi hætti,“ segir María sem heldur áfram: 

„Á síðasta ári var í ýmsum fjölmiðlum hérlendis og erlendis, þ. á m. hjá Heimildinni, fjallað um þann ágalla á framangreindu kerfi sem reyndist vera fyrir hendi, þ.e. að tilkynningar um sviptingar og takmarkanir starfsleyfa færu ekki í öllum tilvikum í réttan farveg innan EES ríkjanna. Embættinu var kunnugt um þennan veikleika, hafði komið þeim áhyggjum á framfæri við þá sem reka kerfið og hert eigið eftirlit. Mál sem þessi eru því komin í mun betri farveg frá því sem áður var þó svo enn megi bæta samstarf og gagnaskil milli ríkja.“