„Þegar þú átt séns þá er það að reyna að grípa hann“

„Þetta var virkilega góð frammistaða hjá liðinu hér í dag gegn þessu öfluga franska liði. Við vorum vel skipulagðir og klárir. Það gaf aðeins á bátinn í fyrri hálfleik, en menn þjöppuðu sér saman við það og heilt yfir verð ég að segja að það var góður bragur á liðinu.“

Íslenska liðið spilaði eins og áður segir afar vel og þá sérstaklega í seinni hálfleik þar sem Frakkar náðu ekki að skapa sér mikið ásamt því fengu strákarnir okkar urmul færa til að klára leikinn. Ólafur segir að liðið hafi spilað frábæran varnarleik og tekist að stöðva Frakka áður en þeir hafi náð að refsa.

„Það sem einkennir kannski þetta franska lið er að þeir vilja fara í þessi hröðu upphlaup, og ef við töpuðum boltanum hátt voru þeir fljótir að refsa. Við töluðum um að missa ekki boltann þegar við værum úr stöðum, til að forðast að fá á okkur þessi upphlaup. Mér fannst það takast vel hjá okkur og við færðum liðið aðeins til á vellinum þannig að hægri bakvörðurinn okkar, Hlynur, væri ekki jafn einn á kantinum. Það gekk líka vel hjá okkur í seinni hálfleik. Þá voru menn líka aðeins rólegri á boltanum í staðinn fyrir að reyna alltaf fyrstu sendinguna í gegn. Við fengum aðeins meiri orku eftir að við náðum ró á boltann.“

Í ljósi hvernig þetta spilaðist er þá ekki svekkjandi að hafa ekki fengið öll þrjú stigin?

„Við hefðum alveg getað sett sigurmarkið hér í seinni hálfleik. Þeir áttu sömuleiðis ekki mörg skot á markið. Varnarleikurinn var frábær og sóknarleikurinn virkilega góður líka. Það voru möguleikar á að vinna þennan leik, en við getum ekki verið að svekkja okkur á því. Við erum bara farnir að einbeita okkur að næsta verkefni, og það er gegn Sviss á þriðjudaginn. Nú tökum við það sem við gerðum vel hér inn í þann leik og hugsum um hvernig við ætlum að vinna Sviss.“

Sviss á þriðjudaginn, hvernig metur þú möguleikana fyrir þann leik?

„Ég met möguleikana gegn Sviss fína. Það hefur verið mikill stígandi í hópnum og liðinu undanfarin misseri. Strákarnir eru með sjálfstraust og þeim líður vel. Við eigum bara að vera brattir. Við hvílum okkur núna og verðum klárir gegn Sviss á þriðjudaginn. Sviss er auðvitað hörkulið líka, en þegar þú átt séns þá er það að reyna að grípa hann.“