„Sagði bara við hann, ég skal taka þetta“

Hann segir að liðið sé sátt við stigið og hrósa frammistöðunni mikið sem strákarnir sýndu.

„Við erum allir ótrúlega sáttir. Þetta var geggjuð frammistaða hjá liðinu, sérstaklega hvernig við náðum að verjast þeim. Hvernig við spiluðum sem lið í dag var sömuleiðis bara geggjað. Við erum þannig lagað séð allir frekar sáttir við stigið. Auðvitað hefðum við viljað þrjú stig og við hefðum alveg getað unnið þennan leik, að sjálfsögðu. En þegar maður horfir á stærri myndina þá eru þetta Frakkar og við erum Ísland. Það er alltaf gott fyrir okkur að ná í stig gegn Frökkum. Eins og ég segi erum við alveg sáttir, en mögulega smá sárir, samt ekki mikið.“

Það mátti sjá mikinn mun á liðinu í seinni hálfleik þar sem liðið var í rauninni miklu betra en það franska en íslenska liðið fékk þó nokkur tækifæri til að klára stigin þrjú hér í dag. Hvað lögðu þið upp með í hálfleik

„Við vorum auðvitað ennþá inni í leiknum þegar við fórum inn í hálfleik. Allir voru rólegir inni í klefa og ekkert óþarfa stress um hvernig leikurinn myndi enda. Lokatölurnar eru heldur ekkert endilega það sem við erum aðallega að hugsa um, heldur viljum við sjá góða frammistöðu, því ef hún er góð þá endar þetta eins og við viljum hafa þetta.“

Daníel Tristan skoraði mark Íslands í dag en það gerði hann glæsilega beint úr aukaspyrnu. Nafni þinn Daníel Freyr Kristjánsson stóð yfir boltanum með þér þarna. Hvað sagðir þú við hann áður en þú tókst spyrnu?

„Ég sagði bara við hann: ‚Ég skal taka þetta‘ og smellti honum svo bara í vinkilinn.“